NAVENDA NÛÇEYAN - Bi boneya 8’ê Adarê jinan li Helebê civînek li dar xist û tê de rêbazên ku jin mafên xwe bi dest bixin, xwe rizgar bikin û jiyaneke demokratîk ava bikin, hatin nîqaşkirin.

 

Bi diruşma "Jin, Jiyan, Azadî" û bi boneya hatina Roja Jinan a Cîhanê Weqfa Piştgirî û Xurtkirina Jinan li hola Sêzer a li taxa Celaa ya Helebê civînek li dar xist.

 

Di civînê de jinên serbixwe, mamoste, parêzer û endamên meclisên taxên Şêxmeqsûd û Eşrefiyê, rêxistin û tevgerên jinan, beşdar bûn. Di civînê de mijara yekane ji hêla endama weqfê Şêraz Mihemed ve hat xwendin. Di mijarê de girîngî bi felsefeya "Jin, Jiyan, Azadî" hat dayîn û hat gotin ku ew metod û hêmana bingehîn a hebûna jinan e.

 

Her wiha Şêraze Mihemed di mijarê de ba kişand ser rêbazên rizgarkirina jinan û got: "Bi yekitî, rêxistinkirin û hêza me ya hevbeş divê em civakê bi pêş bixin û yekitiya jinên Sûriyeyî bi tevahî pêkhateyên wê ava bikin."

 

Dûre beşdaran nîqaş kir. Çalakgera civaka sivîl a di mafên jinan de dixebite Aras Kor Misto got pêwîst e jinan mafên xwe bistînin, da ku îstîqrar li herêmê misoger bibe û bêyî destûreke adilane îstîqrar li herêmê pêk nayê."

 

Parêzer Meys El Rîm jî got: "Çavkaniya paşguhkirina rola jinan ji nebûna mekanîzmaya birêvebirina qanûnên ku mafên jinan heye, tê. Ji lew re divê em wan qanûnan aktîv bikin û dûre qanûna parastinê deynin."

 

Li aliyekî din jî endama Komeleya Sefa ya Sêwiyan Sefa Ebdulqadir diyar kir ku hêza jinan têrê dike ku guhertinan pêk bîne û civakan bi rêxistin bike.