WAN - Hevşaredara Bajarê Mezin a Wanê Neslîhan Şedal, bal kişand ser ceza dayîna hevşaredar Abdullah Zeydan û wiha axivî: "Me di roja ewil de got û em niha jî dibêjin: Em îradeyê biparêzin. Lê em ê tu carî vê îradeyê ji talanker û talankaran re nehêlin."

 

Piştî ku Hevşaredarê Bajarê Mezin ê Wanê Abdullah Zeydan di rûniştina doza ku li 5'emîn Dadgeha Cezayê Giran a Amedê hat dîtin de 3 sal û 9 meh cezayê girtîgehê lê hat birîn, gel li ber avahiya şaredariyê kom bû. Bi hezaran welatî li ber avahiya şaredariyê dirûşmên "Abdullah Zeydan rûmeta me ye", "Neslîhan Şedal rûmeta me ye" û "Em ê bi berxwedanê bi ser bikevin" berz kirin. Gel hatina gel şaredariyê berdewam dike.

 

Derbarê mijarê de Hevşaredara Bajarê Mezin a Wanê Neslîhan Şedal ji ajansa me JINNEWS'ê re axivî. 

 

'Şaredariyê xistin xizmeta gel'

 

Neslîhan Şedal, diyar kir ku ev demeke dirêje li dijî vîna gelê Wanê hewldanên desteserkirinê hene, berxwedana gelê Wanê ya di hilbijartinên herêmî yên 31'ê Adarê û xebatên hilbijartinê de bi rojan dewam kir, bi bîr xist û got: “Em dikarin bibêjin ku piştî serketinên 14 ji 14’an nexweşî heye. Li hemberî modela şaredariyê ya ku me li vir pêk aniye dilnexwaziyek heye. Ger gel bi qeyûmên ku ji aliyê hikûmetê ve hatine tayînkirin kêfxweş bibûya, me bi rêjeyeke mezin şaredarî nedigirt. Em dizanin ku gelek sextekarî, veguhastina dengan hat kirin û xwestin bi sextekarî dengan bi dest bixin. Lê tevî van hemû hîle û komployan jî me şaredariyên xwe ji desteserkirina qeyûman û polîtîkayên mêtingeriyê yên hikûmeta AKP’ê bi awayekî serkeftî derxistin û xistin xizmeta gel.”

 

'Mixabin ev ne dewleteke hiqûqê ye'

 

Neslîhan Şedal diyar kir ku ew xebatên xwe yên şaredariyê bi felsefeya jiyana demokratîk, ekolojîk û azadiya jinê didomînin û diyar kir ku ev model bi operasyoneke tirs û feraseteke mezin re rû bi rû ye û xebatên wan ên li ser ziman û çanda gelan dike hedef û wiha bi lêv kir: “Ji bo em xizmetê nekin, li gel operasyonên feraset û tayînkirina qeyûman gelek polîtîka hatin meşandin. Tevî van êrişan jî me bi gelê xwe re li ser esasê aqil û ruhê kolektîf gelek xebat meşandin. Mixabin ev ne dewleteke hiqûqê ye. Em li welatekî ku qanûn û destûra bingehîn êdî nemaye û nayên naskirin de dijîn."

 

Astengiya li pêş modela hevserokatiyê 

 

Neslîhan Şedal, anî ziman ku dema mijar kurd dibe, li şûna mafê dengdayîn û hilbijartinê pratîkeke cuda dikeve meriyetê û bi bîr xist ku bi tayînkirina qeyûman li Şaredariya Akdenîzê îradeya Gelê Kurd tê paşguhkirin û wiha berdewam kir: "Li vir bi sedsalan bi bawerî û zimanê xwe jiyaneke wekhev, azad û adil jiyaye. Weke DEM Partiyê em vê şêwazê jiyanê di rêveberiyên herêmî de pêk tînin. Li hemberî vê rastiyê ku gelek polîtîkayên qirkirina jinê tên jiyîn û tê xwestin ku mirov bên asîmîlekirin, me navenda jinê ya ku têgihîştin û têgihîştina jinê bû modela jiyana azad û şaredariyê azad bijîn, polîtîkayên aboriyê pêk bînin û bi dîroka xwe re hevdîtin pêk bînin êrişa herî bingehîn e. Yek ji wan sedeman jî pêşîgirtina li civakbûna modela hevserokatiyê ya li Wanê bû."

 

'Gel wê tu carî rê nede dagirker û talankaran'

 

Neslîhan Şedal, diyar kir ku hikûmet li dijî Şaredariya Bajarê Mezin a Wanê amadekariya êrişê dike û wiha axivî: "Sedema sereke ya cezakirina vê dozê ev amadekarî ye. Em bêjin ku me ev tişt bi hêsanî bi dest nexistin. Me şaredarî jî bi hêsanî negirt. Ji aliyê jin, ciwan û gelê Wanê ve kedeke mezin tê dayîn. Di 31’ê Adarê de jî hewldana desteserkirina şaredariyê hat kirin, gel destûr neda. Di dema erkdarkirinê de xwestin şaredariyê bi dest bixin, lê gel daket kolanan û bertekên xwe yên demokratîk nîşan da. Li vir hewldanek mezin heye. Ev gel wê ti carî rê nede dagirker û talankaran. Gelê me niha li gel me nobedê digirin. “Wek ku me ji roja yekem ve gotiye, niha jî em dibêjin: Em ê vê îradeya xwe bi nirxê canê xwe jî biparêzin û ti carî ji talanker û talankaran re nehêlin.

 

'Gel serî hilda'

 

Di dawiyê de Neslihan Şedal jî ku bang li gelên Kurdistan û Tirkiyeyê kir, axaftina xwe wiha bi dawî kir: 'Me tu carî serkeftina Wanê tenê weke serkeftina Wanê nedît. Ji ber ku li Tirkiye û Kurdistanê hemû gel serî hilda. Ev serkeftin encama hevgirtina civakî bû. Ger em bertek nîşan bidin, gotinên xwe bikin yek, hestên xwe bikin yek û bêhiqûqiyê red bikin, em ê hemû bajarên xwe rizgar bikin û vîna xwe biparêzin. Lewma em bang li hemû pêkhateyan dikin ku li dora vê hevgirtinê bibin yek."