AMED/ŞIRNEX - Şahiya "Roja Zimanê Tirkî" ya Koleja TED a Diyarbakirê û TFF'ê ji ber dirûşma Kurdî ceza li  Amedsporê birî li Amed  û Şirnexê hatin protestokirin. Di çalakiyan de bal kişandin ser "ferzkirina yekzimanî ya li ser mafê zimanê dayikê".

 

Şahiya "26'ê Îlonê Roja Zimanê Tirkî" ya Koleja TED a Diyarbakirê ku li wir pankartên pesnê zimanê Tirkî dan zarokan û ji xwendekarekî hat xwestin ku fermana Karamanoglu Mehmet Bey a “Mecbûrî xwendina zimanê Tirkî” bixwîne, rastî nerazîbûnê hat. Federasyona Futbolê ya Tirkiyeyê (TFF) ji ber dirûşmeya Kurdî "Koma Me Bona We" ku di reklama formaya Amedsporê de cih girtibû 110 hezar TL cezayê pere birî, li gelek bajaran hat protestokirin.

 

Amed

 

Platforma Ked û Demokrasiyê ya Amedê li avahiya Odeya Endezyarên Nexşeyê daxuyanî da. Di daxuyaniyê de hat bibîrxistin ku "Roja Zimanê Tirkî" di lîsteya fermî ya Wezareta Perwerdehiya Neteweyî de cih nagire. Berdevkê Platformê Sedat Sever diyar kir ku di pîrozkirina roja ziman de ti pirsgirêk tune, lê ew li dijî hişmendiya ku yekzimanî li sr zimanên din ferz dike û qedexekirina zimanên din rewa dike ne.

 

Sedat Sever ev tişt anî ziman: "Ziman bîra mirovahiyê ye. Her ziman bêhempa ye û zimanê dayikê bingeha nasnameyê ye.” Sever anî ziman ku ji ber ku zarok mafê perwerdehiyê bi zimanê dayikê nagirin, di bin dezavantajê de ne û got ku pergala heyî cudahiyan tepeser dike û li şûna wê pêwîstî bi hişmendiyeke pirrengî û azadîxwaziyê ya perwerdehiyê heye. Sever cezayê ku li Amedsporê hatiye birîn şermezar kir û bang li federasyonê kir ku biryara xwe betal bike

 

Şirnex

 

Bertekên li hemberî biryara TFF'ê li Şirnexê jî zêde bûn. Li ber Komeleya Ziman û Çandê ya Birca Belek a Cizîrê daxuyanî hat dayin. Di daxuyaniyê de pankarta "Zimanê Kurdî xeta me ya sor e" hate vekirin.

 

Rêveberê komeleyê Rojger Nuh Ant diyar kir ku cezayê ku li Amedsporê hatiye birîn êrîşek li ser nasnameya Kurd e û şahiya Koleja TED a Diyarbakirê wekî "berdewamiya polîtîkayên înkarker" bi nav kir. Ant daxwaz kir ku TFF cezayê betal bike û Koleja TED ji gelê Kurd lêborînê bixwaze.

 

Parlamenterê DEM Partiyê yê Şirnexê Mehmet Zekî Îrmez got, "Kurd sed sal e ji ber zimanê xwe tên cezakirin. Kurdî xeta me ya sor e. Heta ku ev zîhniyet biguhere, em ê têkoşîna xwe mezintir bikin."

 

Daxuyanî bi dirûşma "Bijî zimanê Kurdî" bi dawî bû.