NAVENDA NÛÇEYAN - Di pîrozbahî û mîtîngên 4’ê Nîsanê yên li welatên Ewropayê pêk hatin de peyama “Em ê banga Rêber Apo ya avakirina civaka demokratîk esas bigirin” hat dayin.

 

Li gelek bajarên Ewropayê pîrozbahiyên bi boneya 76’emîn rojbûna Rêberê Gelê Kurd Abdullah Ocalan didomin.

 

Hanover

 

Bi pêşengiya jinên Kurd ji bo azadiya fîzîkî ya Rêberê Gelê Kurd Abdullah Ocalan li bajarê Hannover ê Almanyayê mîtîng hat lidarxistin.

 

Di axaftinan de ev tişt hatin gotin: “Me bi dirûşmên “Bijî Serok Apo” û “Jin Jiyan Azadî” dengê xwe bilind kir. Ev dengê ku bi hêza jinê pêk hat, bû sembola azadî û berxwedanê.Ev dirûşmên sotîner di dilê me de deng veda, biryardariya gelê me û têkoşîna azadiyê careke din nîşan da. Berxwedan û têkoşîna me ya ji bo azadiya Rêbertiyê roj bi roj mezin dibe. Em gelê ku hêviyê mezin dikin û berxwedanê bi agir mezin dikin. Têkoşîna me wê ti carî bi dawî nebe. Peyama “Azadiya Rêber Apo azadiya me ye.”

 

Toronto

 

76’emîn rojbûna Rêberê Gelê Kurd Abdullah Ocalan li bajarê Toronto yê Kanadayê bi şahiyeke girseyî hat pîrozkirin.

 

Ciwanên Kurdistanî li ber Navenda Civaka Demokratîk a Kurd li hev civiyan, deqeyek rêz girtin, piştre fîşekên hewayî teqandin û dirûşmên "Rojbûna te rojbûna me ye" û "Bijî Serok Apo" berz kirin.

 

Di daxuyaniyê de hat diyarkirin ku banga aştî û civaka demokratîk a Abdullah Ocalan ya 27’ê Sibatê ji aliyê gelek pêkhateyên civakî û bi taybet gelê Kurd ve hat pêşwazîkirin. Di berdewamiyê de wiha hat gotin: “Rêber Apo ji dayikbûna xwe heta roja me ya îro ji bo azadiya gelê me û gelên me her tim têkoşiyaye. Fikir û ramanên Rêber Apo ji bo gelê me û gelên cîhanê bûye ronahiyek. Peyama ku Rêber Apo ji me re şand, banga afirandina civakeke demokratîk e. Em ê bi hev re bingeha edalet û azadiyê ava bikin, heta ku em civakek azad ava bikin em ê li cem Rêber Apo bin.”

 

Pîrozbahî bi stranên gelerî û gerandina govendê bi dawî bû.

 

Reıms

 

Komuna Jinê ya Xwebûn li Navenda Civaka Kurd a Demokratîk a Arîn Mîrkan a bajarê Riîms ê Fransayê, rojbûna Rêberê Gelê Kurd Abdullah Ocalan pîroz kir.

 

Beriya pîrozbahiyê ji bo zarokan çalakî hatin lidarxistin. Di çalakiya ku bi wêneyên rengîn hatin hildan de zarok kêfxweş bûn, wate û girîngiya 4'ê Nîsanê ji bo gelê Kurd hat destnîşankirin.

 

Di peyama 4'ê Nîsanê ya Komuna Jinê ya Xwebûn de ev tişt hatin gotin: "4'ê Nîsanê rojbûna jina azad, Kurdê azad, mirovê azad e. Îro ne tenê rojbûna Rêber Apo, rojbûna jiyana gelê Kurd a nû ye. Felsefeya ku Rêber Apo bi taybetî ji bo jinan derxistiye holê û bi saya felsefeyê me dest bi naskirina xwe kir.  Ji ber vê yekê em rojbûna Rêber Apo weke rojbûna xwe dibînin û bi taybetî jî li Rêber Apo, li hemû jinên şoreşger ên li ber xwe didin û li hemû gelê Kurd pîroz dikin.”

 

Pîrozbahiyê bi gerandina govendê heta saetên dereng dewam kir.

 

Mannheim

 

Gelek kes beşdarî pîrozbahiya li bajarê Mannheîm a Almanyayê ya li DKTM’ê hat lidarxistin bûn.

 

Salona pîrozbahiyê bi posterên Abdullah Ocalan û alên Kurdistanê hat xemilandin. Pîrozbahî bi muzîka Kurdî dest pê kir. Di bernameyê de li ser fikir û têkoşîna Abdullah Ocalan axaftin hatin kirin û li ser mijarên azadî û berxwedanê helbest hatin xwendin.

 

Di pîrozbahiyê de bê navber dirûşmên “Bijî Serok Apo!", "Rojbûna te pîroz be Serokê me” hatin berzkirin. Pîrozbahî bi gerandina govendê bi dawî bû.