NAVENDA NÛÇEYAN - Malpera Dengê Girtiyên Rojhilatê Kurdistan û Îranê ragihand ku nivîskara Îranî ji aliyê hêzên ewlekariyê yên Îranê ve hate îşkencekirin û di encamê de ji rû û lingên xwe bi giranî birîndar bûye û rewşa wê giran e.

 

Li gorî Malpera Dengê Girtiyên Rojhilatê Kurdistan û Îranê belavkirî, çalakvan, nivîskar û rexnegira wêjeyî Mêhrgan Nemawer a 38 salî û xelkê Hedeşt ê li sînorê bajarê Kohgiluye û Boyer Ehmed, ji aliyê hêzên ewlehiyê yên Îranê ve hatin êşkencekirin û bi giranî birîndar bû.

 

Hate diyarkirin ku Mêhrgan Nemawer di dema îşkenceyê de ji rû û lingên xwe bi giranî birîndar bûye û rewşa wê girane. Her wiha piştî lêdana giran, telefona nivîskar Mêhrgan Nemawer jê hatiye standin û desteserkirin.

 

Hêjayî gotinêye ku 2’ê Adara 2024’an çalakvan, nivîskar û rexnegira wêjeyî Mêhrgan Nemawer ji aliyê hêzên Wezareta Îtlaatê ya Îranê ve hate binçavkirin û piştre hate berdan. Carek din Mêhrgan Nemawer di 18’ê Adara îsal de hate binçavkirin û piştî 16 rojan dibinçavan de ma, bi dayîna berdêl û bi şêweyekî demkî hatibû berdan.