NAVENDA NÛÇEYAN - Çalakiya nobedê ku bi daxwaza azadiya Rêberê Gelê Kurd di 25'ê Hezîrana 2012'an de li bajarê Strasbourg ê Fransayê destpê kir, di hefteya 667'an de dewam dike.

 

Nobeda Azadiyê ku ji aliyê gelê Kurd ê li Ewropayê ve hefteyê carekê bi dorveger tê meşandin, di hefteya 667'an de bi komeke nû dewam dike.

 

Hefteya 667'an ku li rojbûna 76'an a Rêberê Gelê Kurd rast hat, bi endamên tevgera jinê dewam dike.

 

Di nava koma nû de Mûşrîde Oltan, Meyrem Karataş, Halîme Oltan û Cenet Elenî hene.

 

Berdevka komê Muşrîde Oltan bi navê çalakgeran daxuyanî da û bi bîr xist ku nobed 13 sal in dewam dike û got, "Berxwedana Rêber Apo û gelê Kurd, nehişt ku dijminê dagirker bigihêje armancên xwe."

 

Berdevka komê got, "Bi saya Rêberê xwe û berxwedana gelê xwe serê me bilind e" û diyar kir ku ew xwedî li pêvajoya nû derdikevin ku di 27'ê Sibatê de bi banga dîrokî ya Rêber Apo destpê kir.

 

Mûşrîde Oltan herî dawî got, "Heta ku Rêberê me azad bibe em ê li qadan bin."