Gulistan Gulmuş - Derya Ren

 

RIHA - Fatma Çakmak a ji aliyê Yasîn Çakmak, parêzvanekî serokomar ve hatiye îşkencekirin diyar kir ku jiyana wê di xetereyê de ye û daxwaza piştgiriyê kir û got, "Ger ez bimrim, Yasîn Çakmak kujerê min e. Ji kerema xwe piştgiriyê bidin min."

 

Yasîn Çakmak, parêzvanê Serokomarê AKP'yî Recep Tayyip Erdogan û karmendê Yekîneya Perwerdeyê ya Daîreya Parastina Serokkomariyê, di 12'ê Çileyê de hewl da ku hevjîna xwe Fatma Çakmak bi tiştekî tûj û îşkenceyê bikuje. Piştî bihîstina bûyerê cîranan mudaxele kirin û Fatma Çakmak birin nexweşxaneyê. Yasîn Çakmak hate binçavkirin lê piştî ku li dadgehê xuya bû bi çavdêriya dadwerî hate berdan.

 

Fatma Çakmak îşkenceya ku lê hatiye kirin û bûyerên piştî wê ji JINNEWS'ê re vegot.

 

'16-17 sal in wekî parêzvan dixebite'

 

Fatma Çakmak, dema ku agahî li ser sûcdar da, got, "Yasin Çakmak li Daîreya Parastina Serokomariyê dixebite. Ew di şaxa perwerdeyê de ye. Ew mamosteyê parêzvanan e. Ew perwerdehiya xweparastinê dide tîmên ku Serokomarê me diparêzin. 16-17 sal in wekî parêzvan dixebite."

 

'14 sal in tundiyê dibînim'

 

Fatma Çakmak da zanîn ew 14 sal in zewicî ye û got, "Ji salên pêşîn ên zewaca min ve, ez rastî tundiya hem fîzîkî û hem jî psîkolojîk hatim. Di meha Nîsanê de, min êdî nikarîbû tehemûl bikim û min jê re got ku ez dixwazim ji te veqetim. Lê ev xwesteka ji hev veqetînê ji bo wî wêranker bû. Wî dest pê kir ku bifikire ka ez çawa dikarim biryara berdana wî bidim. Min dîsa tehemûl kir, wekî ku min di salên berê de kiribû. Lê wî tundiya xwe berdewam kir. Du meh berê, me dîsa şer kir û ez çûm cem malbata xwe. Ew hat û bi min re axivî, lê ez ne bawer bûm, lê ji ber zarokên xwe neçar mam ku vegerim. Piştî ku ez vegeriyam, pirsgirêk berdewam kirin."

 

'Wî îşkence li min kir'

 

Fatma Çakmak şîdeta ku ji aliyê sûcdar Yasîn Çakmak ve li ser wê hatiye kirin bi van gotinan vegot: "Wî nehişt ku ez derkevim derve. Ger qiraxa perdeyê 3-4 santîmetreyan vekirî bûya, wî dihat û êrîşî min dikir. Me roja bûyerê nîqaş kir û min got ku ez dixwazim em ji hev veqetin. Ez difikirim ku wî ez bêhiş kirim ji ber ku ez tînim bîra xwe ku wî devê min ji pişt ve bi tiştekî girtibû. Ji bilî vê, ez tiştekî naynim bîra xwe. Ez du-sê caran di dema şîdetê de şiyar bûm. Carekê, min bihîst ku kurê min qîriya, 'Bavo te diya mi. kuşt!' Careke din, min li erdê golek xwînê dît. Min hewl da ku rabim, lê ez şemitîm. Piştre wî berdewam kir ku êrîşî min bike. Ez diêşim ku zarokên min şahidiya şîdeta ku min dît kirine. Zarokên min agahî dan cîranan û cîran hatin. Cîranan gazî ambulansê kirin. Polîs hatin, lêkolîna cihê sûc kirin. "

 

Bersûc serbest e 

 

Fatma Çakmak bi bîr xist ku piştî bûyerê sûcdar Yasîn Çakmak hatiye binçavkirin û got, "Dema ku ez li nexweşxaneyê bûm ew hatiye binçavkirin. Lêbelê ez hîn bûm ku ew di bin çavdêriya dadwerî de hatiye berdan."

 

Li kurê xwe jî xistiye

 

Fatma Çakmak diyar kir ku sûcdar Yasîn Çakmak li kurê xwe jî xistiye û got, "Yasîn bi xwe alîgirê Trabzonsporê ye. Kurê min jî alîgirê Trabzonsporê ye. Kurê min vê dawiyê ji aliyê bavê xwe ve lêdan xwar ji ber ku wî got ku ew hem piştgiriya Trabzonsporê û hem jî Fenerbahçeyê dike."

 

'Ger ez bêm kuştin kujer Yasîn Çakmak e'

 

Fatma Çakmak, bi destnîşankirina ku sûcdar hîn jî gefê li wê dixwe, banga hevgirtinê kir û got,"Wî ji birayê min re got ku ew ê tiştê ku dest pê kiriye biqedîne. Ew gefê li birayê min dixwe. Di telefonê de, wî ji birayê min re got, 'Min hîn nekariye wê bişînim bihuştê.' Tiştekî min tune ku ez bikim. Ez dayika sê zarokan im û ez naxwazim zarokên min bê dayik bimînin. Ez naxwazim zarokên min di destên wî mêrî de bin. Ez ji bo kuştinê hatim hedefgirtin, lê ez nemirim. Ez bimrim Yasîn Çakmak kujer e. Ez edaletê dixwazim. Ew gefê li min dixwe. Ma ew serbest hat berdan da ku ew tiştê ku dest pê kiriye biqedîne? Ji kerema xwe, ez ji hemî rayedarên dadwerî rica dikim ku çi hewce be bikin. Fermana qedexeyê hat dayîn, lê tenê di nav 200 metreyan de. Ew ne cureyê kesê ye ku wê fermana qedexeyê bi ciddî bigire. Ji kerema xwe piştgiriyê bide min.”