AMED - Girtiyên di çalakiya greva birçîbûnê de, peyamek ji Newroza Amedê re şandin û gotin: “Baweriya me heye ku tecrîd dê rabe û Serokê me dê bi awayekî fizîkî azad bibe.”

 

Girtiyên siyasî yên li girtîgehên bakurê Kurdistanê û Tirkiyeyê ji bo azadiya fizîkî ya Rêberê PKK’ê Abdullah Ocalan, çareserkirina pirsgirêka kurd bi rêyên demokratîk û rakirina tecrîdê, dest bi greva birçîbûnê ya demkî û dorveger kiribûn. Çalakiya girtiyan di roja 116’an de berdewam dike. Peyama girtiyan di Newroza Amedê ya biheybet de hate xwendin. 

 

Peyama girtiyan a ji aliyê parlamentera DEM Partiyê ya Êlihê Zeynep Odûncû ve hate xwendin.

 

Peyama girtiyan wiha ye: 

 

“Newroz dengek bû

 

Dengên çakûç û hesin

 

Pişt re bû tîna agir

 

Veguherî bû deng û rengên azadiyê di dilê Rojhilata Navîn de ku navê wê Kurdistan bû...

 

Newroza berxwedanê û azadiyê di serî de li Rêberê Azadiyê Rêber Apo, hevalên li Wargehên Azad, li dayikên çalakvan, li gelê xwe û li hemû beşdarvanên Newroza azadiyê pîroz dikin. Bi biryardariya ku tecrîd hilweşe û Rêberê Azadiyê bi fizîkî azad bibe, em ji wek şoreşgerên li zindanên Kurdistan û Tirkiyeyê tev li hemleya azadiya fizîkî ya Rêber Apo bûn û berxwedana me bi biryardarî berdewam dike. Em bi hêvî û bawer in ku dê tecrîd hilweşe û Rêberê me bi awayekî fizîkî azad bibe. Ev qada Newrozê îro veguheriye qada azadiyê û azadiya Rêberê xwe diqîre. Bi mizginiya biharê cardin Newroza we hemûyan pîroz be!”