COLEMÊRG - Şandeya ku di “Meşa Mezin a Azadiyê” de cih digirin, li navenda Colemêrgê ji aliyê dehan kesî ve bi dirûşmên “Bijî Berxwedana Îmraliyê” û “Colemêrg bi we serbilind e” hat pêşwazîkirin.

 

“Meşa Mezin a Azadiyê” ku ji bo azadiya fîzîkî ya Rêberê PKK’ê Abdullah Ocalan û çareseriya demokratîk a pirsgirêka Kurd ji Wanê dest pê kir, gihîşt Colemêrgê. Şandeya ku ji Hevserokê Giştî yê Partiya Demokratîk a Gelan (DBP) û gelek sazî û parlamenterên ku di şandeyê de cih digirin, li navenda Colemêrgê dest bi meşê kirin.

 

Bi dirûşme û stranan meşiyan

 

Şandeya ku çû Colemêrgê, beriya wê bi kîlometreyan ji gundê Çemê Ezo heta gundê Dêzê yê ku Geliyê Bihûşt û Cehenem lê ye, bi dirûşmên “Bijî Berxwedana Zindanan”, “Ji tecrîdê re na, ji aştiyê re erê”, “Bijî Berxwedana Îmralî”, “Em ê bi berxwedanê bi ser bikevin” û tililiyan meşiyan. Şande bi coşeke mezin meşa xwe berdewam kir û gelek caran stranên “Berxwedan xweş doz e” û “Girtiyên azadiyê” gotin.

 

Pêşwazîkirina girseyî: Bijî Berxwedana Îmraliyê

 

Piştî meşê ber bi navenda Colemêrgê ve ketin rê. Girseya di ketina Colemêrgê ji aliyê dehan kesan ve bi tilîlî û dirûşmeya “Colemêrg bi we serbilind e” hatin pêşwazîkirin. Şande bi tevî girseyê heya avahiya navendê ya DEM Partî yê bi dirûşmeyên “Bijî Berxwedana Zindanan”, “Ji tecrîdê re na, ji aştiyê re erê”, “Em ê bi berxwedanê bi ser bikevin”, “Bijî Serok Apo” û “Bijî Berxwedana Îmralî” berz kirin ve meşiyan.

 

Li pêşiya avahiya navendê jî ji aliyê gel ve dirûşmeyên “Bijî Berxwedana Îmraliyê” û “Gelê Colemêrgê bi we serbilind e” û çepikan hatin pêşwazîkirin. Li ser coşa girseyê heyetê jî bi gotina “Em bi we serbilind in” bersiv da.

 

‘Hemû kes bila piştevaniya vê meşê bike’

 

Hevserokê Giştî yê DBP’ê Keskîn Bayindir, li pêşiya avahiyê axivî û diyar kir ku gelê Colemêrgê her tim piştgirî daye têkoşîn û partiya xwe. Keskîn, bal kişand ser pêwîstiya “Azadiya Rêberê PKK'ê Abdullah Ocalan û çareseriya pirsgirêka Kurd” û wiha got: “Ji ber vê yekê em ji vê rêyê re dibêjin rêya azadî û rûmetê. Bila êdî çiyayên Colêmergê ne cihê qereqolan, cihê azadî û govendê be. Ji ber vê di dawiya vê meşê de bila azadiya xalîçeya kurd, gelên bindest û gelên Tirkiyeyê be.” Keskîn, bal kişand ku şerê bi salan e li Kurdistanê didome û da zanîn ku ew dixwazin pirsgirêka kurd bi rêyên demokratîk çareser bibe. Keskîn, wiha dirêjî da axaftina xwe: “Divê ciwanên kurd û tirk ji ber şer neyên kuştin û neyên kuştin. Ji ber vê yekê muxatabê sereke yê vê mijarê Birêz Ocalan e. Divê ev pirsgirêk bê çareserkirin. Banga me ji gelê kurd û gelên Tirkiyeyê re heye. Ev pirsgirêk ne tenê pirsgirêka Gelê Kurd e, pirsgirêka her kesî ye. Me ji bo aştî û azadiyê bîne vî welatî me dest bi meşa xwe kir. Banga me ji bo gelê Tirkiyeyê jî heye. Bila piştgiriyê bidin vê meşê. Ev meş meşa aştî û azadiyê ye. Ev meş dawiya şer e. Heta ev yek pêk were em ê bi piştgiriya we vê meşê bidomînin.”

 

‘Ev meş bû hêvî’

 

Namzeta Şaredariya Colemêrgê Viyan Tekçe, destnîşan kir ku 3 rojin ev meş berdewam dike û got ew ji bo rakirina tecrîdê û pirsgirêka kurd re çareseriyê dixwazin. Namzetê Şaredariya Colemêrgê Mehmet Siddik Akiş jî da xuyakirin ku ji bo azadiya Abdullah Ocalan “Meşa Azadiyê” hatiye destpêkirin û got ev tecrît li ser tevahî gelan tê meşandin. Mehmet, bi lêv kir ku ev meş ji hemû gelan re bûye “hevî.”

 

‘Ew ê dengê azadiyê jî bilind bikin’

 

Hevserokê DEM Partî yê Colemêrgê Kadîr Şahîn jî da xuyakirin ku kolanên sar ên Colemêrgê bi dirûşmeyan germ bûye û got ev meş ji bo azadiyê hatiye destpêkirin û meş slav kir. Hevseroka DEM Partî ya Colemêrgê Humeyra Armût jî diyar kir ku gelê Colemêrgê her tim li hember şer û zilmê li berxwe daye û got ew ê dengê azadiyê jî bilind bikin.

 

Piştî axaftinan meşvanên azadiyê û gelê Colemêrgê bi hev re di avahiya Rêxistina DEM Partî de bi dirûşmeya “Bijî Serok Apo” govend gerandin.

 

“Meşa Mezin a Azadiyê” wê danê êvarê jî li Colemêrgê bi civînên gel xebatên xwe bidomîne. Sibe jî dê biçin navçeya Elkê ya Şirnexê.