Gulistan Gulmuş 

 

SEMSÛR - Resame Berfîn Fîdan Korkmaz a ke bi hunerê xo cinî, cimat û xozaya Semsûrî qal kena, projeyanê xo pare kerd û wina va: “Hedîseyê derheqê tîryakî de zêde benê. Rewşê ke qîmetanê exlaqî yê cimatî xerab kenê zêde benê. Nê semedî ra ez fikirîyena ke atolyeyêk hunerî akerî.”

 

Yew bajaro ke seranserê tarîxî hedîsanê cîyayan rê şahidî kerd Semsûr o. Bi zafbawerî antîk bajarêk o ke xoserbîyayîşê xo paweno. Dimayê erdlerzê peyêne ser şarî de birînê girdî awan bîyî. Di serrê peyênî de tesîrê erdlerzî dir bajar hewl dano ancî bêro hemdê xo ser û nê semedî ra hetê zafê hunermendan ra bale anceno. Yew nê hunermendan ra resame Berfîn Fîdan Korkmaz a û her hetê bajarî hunerê xo dir ana têhet.

 

Resame Berfîn Fîdan Korkmaz ajansê ma rê derheqê xebatanê xo de qisey kerd.

 

Cinî, cografya û cimatî hunerê xo de gêna dest

 

Berfîn Fîdan Korkmaz va ke dibistana mîyanênî de mamosteyê aye aye kifş kenê û dima ra Lîseya Huneranê Weşikî yê Semsûrî qezenc kena û va: “Resimkerdiş semedê mi ne hobî ne zî program o. No wareyêk o ke ez eşkena xo uca de îfade bikerî, yo. Resimkerdiş wareyêk o ke mi û cimatî rehet îfade keno. Hunerê mi de babetî zêdeyêr ver bi terzê çîyanê yenê dîyayîşî aver şino. Ez esasê xozayî şuxilnena, pêwa nê fîguranê merdiman şuxilnena. Ez zêdeyêr fîguranê daran şuxilnena. Babetê ke qalî kenê, cinî, cografya û cimat ê. His, stîl, îdeolojîk, hetê ke lingan ser o manenê zî gêna dest. Ez muhîmîye dana fîguranê daran. Darî semedê mi şekilê cuye yê, sey merdimî vînena. Xebatê mi daran ser o aver şinê.”

 

‘Ez do xebatanê xo cinîyan ser o bidomnî’

 

Berfîn Fîdan Korkmaz dîyar kerd ke Semsûr de semedê hişmendîya serdestê mêrdan bi seyan cinîyê ke nêeşkenê xo îfade bikerê est ê û nê çî ard ziwan: “Ez hewl dana ke na rewşe bi hunerê xo qal bikerî. Ma cinîyê hetê nêdîyayîşî yê pey koyan ê. Ez do xebatanê xo cinîyan ser o bidomnî çimkî ma cinîyî tu wext xo rindî îfade nêkerd. Ma her wext pey hîsanê nimiteyî bîyî.”

 

Hemverê tîryakî bi huner têkoşîn

 

Berfîn Fîdan Korkmaz ard ziwan ke aye wazena hunerê xo cinîyanê Semsûrî dir bîyaro têhet û projeyê xo wina va: “Cuya cinîyan keyeyî de vîyarîyena nê semedî ra ez wazena semedê cinîyan wareyêk akerî. Ez wazena atolyeyêk akerî ke cinîyî uca de azad hîs bikerê. Hedîseyê tîryakî zêde benê. Çîyê ke qîmetanê exlaqî xerab kenê zêde bîyî. Nê semedî ra fikirîyena ke atolyeyêk akerdî. Do semedê înan zî bibo terapî. Ez wazena nawitgehêk ke qîmetanê ma nîşan dano akerî. Ez wazena kesanê welatanê bînan ma nêzdî ra nas bikerê. Ez hemverê desteştişê cinî û tutan têkoşînê huqûq û heqî kena. Ez wazena bi hunerê xo hemverê tîryakî têkoşîn bikerî.”