ANQARA - Hemsereka Koma AKPMyî EUL Laura Castel Fort a ke heyetê derheqê prosesî ke ameybî Anqara de ca girewte, va ke ganî mîyanê hetan de muzakereyêk têduşt bêro domnayîş û wina va: “Eke yew het tepişte bibo qalê statuyêka têduştî nêeşkeno bêro kerdiş. Nê semedî ra zî gamê verêne veradayîşê Birêz Ocalan o û tewr tay ganî zemînê têduştîye pê bêro.”

 

Heyetê Koma Çepê Yewbîyaye yê Meclîsê Parlamenterî yê Şûraya Ewropayî (AKPM), semedo ke vengdayîşê Dadgeha Heqê Merdiman a Ewropayî (DHME) yê semedê heqê hêvîye ke derheqê Rayberê Şarê Kurdî Abdullah Ocalan de ame dayîş û şert û mercê ci bêrê asankerdiş, bîyarê vîr, Anqara de pêvînayîş kerd.

 

Hemsereka Koma Çepê Yewbîyaye ya AKPMyî û ji ERCyî endama Senatoyê Îspanyayî Laura Castel Fort a ke heyetî de ca girewtêne, va ke Abdullah Ocalan û PKKyî gamanê tarîxî eştî û lazim o ke dewlete zî gaman bierzo.

 

Laura Castel Fort eşkera kerd ke bi armancê piştîdayîşê meseleya kurdî û semedo ke derheqê rewşa peyêne de agahî bigîro ameya û wina dewam kerd: “Ez verê zî çend reyan ameya tîya û ma derheqê meseleya kurdî de hewl dayî. Ancî zî semedo ke ma bi xo averşîyayîşê prosesî bivînê ameyî tîya.”

 

‘Birêz Ocalan û PKK gamanê muhîmî eştî’

 

Laura Castel Fort eşkera kerd ke proses zaf muhîm o û va: “Heta nika hîn gamî ameyî eştiş. Nika dora dewlete ya. Abdullah Ocalan û PKKyî gamanê tarîxî eştî. Lazim o ke dewlete zî cesaretê xo dinya rê bimojno. Nê semedî ra lazim o ke game bierzo. No asan o. Lazim o ke heqê hêvîye bica bîyaro. 12 serrî yo dewlete bica nêana. Semedo ke qerar bica bîyaro hewcedarîya vurîyayîşê desturê bingehênî û qanûnî çin o. Tena lazim o ke qerar pê bîyaro. Vernîya aştîye akero. No zaf asan o.”

 

‘Ganî prensîbî esas bêrê girewtiş’

 

Laura Castel Fort dîyar kerd ke Tirkîya endama awankerdoxe ya Şûraya Ewropayî ya û wina dewam kerd: “Hîrê prensîbê esasî yê Şûraya Ewropayî est ê. Demokrasî, heqê merdiman, dewleta huqûqî. Heme no yo. No rêxistinêk jeopolîtîkî, NATOyî yan zî asayîşî nîyo. No komîteyêk o ke xo seperneno demokrasî, huqûq û heqê merdiman. Wexto ke tewrê Şûraya Ewropayî bîya lazim bî ke prensîban esas bigîro.”

 

‘Ganî Birêz Ocalan bêro veradayîş’

 

Laura Castel Fort peynîya qiseykerdişê xo de dîyar kerd ke eke mîyanê hetan de têduştî çinbo muzakereyêk têduşt zî çinbeno û wina qedêna: “Eke no muzakere sîyasî bo, lazim o ke her di hetî statuyêk têduştî de bibê. Yew het tepişte bibo qalê statuyêka têduştî nêeşkeno bêro kerdiş. Nê semedî ra veradayîşê Birêz Ocalanî gama verêne ya, tewr tay lazim o ke zemînê têduştîye awan bibo.”