AMED - Dadgehe 19 serrî û 6 aşmî cezaya zîndanî Verfeka verêna TJAyî Ayşe Gokkane rê birna û qerarê dewamkerdiş ê tepiştişê aye da.

 

Roniştişê 5ine yê dewaya ke Verfeka verêna Têgêrayîşê Cinîyanê Azadan (TJA) Ayşe Gokkan ci de ameyîne muhakemekerdiş û verê zî Dadgeha Berzî cezaya di dosyayê “endambîyayîşê rêxistinê” ra yew înan 12 serrî û yê bînî ra 7 serrî û 6 aşmî betal kerdebî, 9ine Dadgeha Cezaya Girane ya Amedî de ame organîzekerdiş.

 

Ayşe Gokkane Zîndanê Cinîyanê Sîncanî de SEGBÎSyî ser û avûkatanê aye eywana ronuştişî de tewrê roniştişî bîyî. Roniştiş hetê nêzdîyanê Ayşe Gokkan û zafê rêxistinê cinîyan ra ame taqîbkerdiş.

 

Dozgerî, derheqê Ayşe Gokkane de bi îdîayê “endambîyayîşê rêxistinê” ra waştî ke 2 reyan bêra cezakerdiş.

 

Ayşe Gokkan a ke pawitişê xo bi kurdkî kerd, ard ziwan ke tu praktîkêk aye yê ke bibo babeta cezayî yan muhakemeyî çin o û nê çî va: “Eke semedê kurdîtîya xo ez yena muhakemekerdiş o wext ganî heme cimat bêro muhakemekerdiş. Heta nasnameyê cimatî nêro qebûlkerdiş do nê muhakemeyî dewam bikerê. Her vatişê mi sey îllegal yeno ercnayîş. Semedê ke mi qalê têkoşînê azadîya cinîyan û têkoşînê azadîya kurdan kerd, ez yena muhakemekerdiş. Ez semedê felsefeya ‘Jin, jiyan, azadî’ yena muhakemekerdiş. Semedê fezlekeyanê zûran ke polîsî amade kerdî ez yena muhakemekerdiş. Muhakemeyê dadgehe semedê mi muhîm nîyo. Yo muhîm no yo ke şar û cinîyan ez muhakeme nêkera. Ez bi TJAyî serberz a.”

 

Dimayê pawitişî avûkatanê Ayşe Gokkane ancî qisey kerd û dîyar kerd ke do têkoşînê xo yê semedê azadîya cinîyan de bidomno.

 

Dimayê mabêne dadgehe qerarê xo eşkera kerd û di dewayan ra bi îdîayê “Endambîyayîşê rêxistine” înan ra yew 12 serrî û dewaya dîyine ra zî 7 serrî û 6 aşmî, bi pêroyî 19 serrî û 6 aşmî ceza Ayşe Gokkane rê birna.