STENBOL - Goreyê raporê Meclîsa ÎSÎGî, aşma êlule de tewr tay 206 kedkar û 9 aşmê verêne serra 2025î de zî tewr tay 1566 kedkarî cînayetê karî de dinyaya xo bedelnayî.

 

Meclîsê Weşîye ya Kedkaran û Asayîşê Karî (ÎSÎG) raporê xo yê aşmê êlule eşkera kerd. ÎSÎGî va ke aşme êlule de tewr tay 206 kedkarî cînayetê karî de dinyaya xo bedelnayî. Nê dayeyan dir hûmara kedkaranê ke 9 aşmê verênê serra 2025î de dinyaya xo bedelnayî bî 1566. Goreyê aşman; çele de tewr tay 180 kedkarî, sibate de tewr tay 124 kedkarî, adare de tewr tay 159 kedkarî, nîsane de tewr tay 156 kedkarî, gulane de tewr tay 178 kedkarî, hezîrane de tewr tay 164 kedkarî, temmuze de tewr tay 207 kedkarî, tebaxe de tewr tay 192 kedkarî û êlule de zî tewr tay 206 kedkarî cînayetê karî de dinyaya xo bedelnayî.

 

Ame dîyarkerdiş ke aşma êlule de 9 tutê kedkarî, 9 kedkarê multecî, 14 kedkarê cinî û 192 kedkarê mêrde dinyaya xo bedelnayî. Cînayetê karî yê aşma êlule de tewr zaf Stenbol de qewimyayî. Antalya de 10, Amed de 9 kedkarî dinyaya xo bedelnayî. Kedkaranê ke cînayetê karî de dinyaya xo bedelnayî 49ê xo kedkarê ramitiş/daristanî, 43yê xo kedkarê înşaet/rayîrî, 34ê xo yê neqlkerdişî, 18ê xo bazirganî/perwerdeyî û 12 zî kedkarê şaredarî/karê pêro yê.