Oznûr Deger 

 

BÊDLÎS - Dimayê ke N.Y. cayê karê xo yê Ray Betonî de hetê patronê xo S.A. ra rastê desteştişî amî, gerre kerd, eşkera bî ke sûcdar eynî cayî de desteştişê zaf cinîyan kerdo.

 

N.Y., ke qezaya Tetwanî ya Bêdlîsî de manena, cayê karê xo yê Ray Betonî de hetê patronê xo yê S.A.yî ra vernê de bi vatişê cinsperestî heqaret ci rê ame kerdiş, pey ra zî bi fîzîkî desteştiş ci rê ame kerdiş. Dimayê desteştişî 30ê temmuze de N.Y. karê xo ra îstîfa kerd û Serdozgerîya Pêroyî ya Tetwanî rê sûcdar S.A.yî gerre kerd. La, pêwa di aşmî yo cipersayîş dest pêkerdo zî, tu averşîyayîş çin o û sûcdar nêtepişnayî. Pêwa nê zî ame dîyarkerdiş ke eynî kesî zaf cinîyê bînan rê zî desteştiş kerdo.

 

Zêdeyêrî di aşman o ke hemverê sûcdarîya S.A. tu tedbîrê qanûnî nêgirewtî, avûkata N.Y., Berfîn Ozan, derheqê na mesela de ercnayîş kerd.

 

‘Cinî semedê zordarî û tersî gerre nêkenê’

 

Berfîn Ozan va ke muwekila aye rastê hem bi vatişê cinsperestî û hem zî desteştişê fîzîkî ameya û va: “Muvekila ma vernê de WhatsApp de bi vatişê cinsperestî heqaret ci rê ame kerdiş. Dima ra, wextê ke ma bi xebatkarê bînan ê cinîyan dir qal kerd, ma dî ke cinîyê bînî zî hetê eynî kesî ra eynî cayê karî de desteştiş dir rî bi rî mendê. Çi heyf, cinîyê ke desteştişî dir rî bi rî mendê, rewşa komelî yê sûcdarkerdişî ra gerre nêkerdê. Cinî zordarî û tersî ra gerre nêkenê. Muwekila ma rê tena heqaretê vatişî yê cinsperestî nêameyo kerdiş, eynî wextî de desteştişê fîzîkî zî ameyo kerdiş. Dima ra merdêyo ke nê de bîyo pispor, mesajanê cinsperestî ke muwekilê ma rê şawitî caardişê ‘pakkerdişê semedê her kesî’ şuxilnayo. La, semedo ke muwekîla ma dîmenê mesajî anta, ma eşkenê nê delîlê dewa de pêşkêş bikerê.”

 

‘Her di cinîyan ra yew desteştiş ameyo kerdiş’

 

Berfîn Ozan va ke Tirkîya de her di cinîyan ra yew desteştiş ameyo kerdiş û va: “Zaf cinî tecrîdî ser û bêkarîya ke cinî ciwîyenê û mobîng û desteştişê ke ê ciwîyenê, vengê xo berz nêkenê. Ma zanenê ke zaf cinî rastê desteştişî ameyê, la ma zanenê ke înan nêeşkenê vengê xo berz bikerê. Wextê ke qanûnî qîm nêkerê û sûcdarî bêceza vînenê yan zî cezayê tewr kêm ginê, cinî rewşa tengasîyê kûr de kewenê. Nê semedî ra lazim o hukmat polîtîkayêk cidî bişuxulno, fek polîtîkayanê cîyaker ra vera bido û qanûnanê ke sûcdaran ceza bikero virazê. Lazim o bi polîtîkaya bêcezayî piştgîrîyê sûcdaran nêkerê û wayîr nêvejîyê.”