DÎLOK - Cinîyê ke bi şîarê “Ma bi hêvîyê ver bi azadîye rayîr ra şinê” Amedî ra ver bi Anqarayî kewtî rayîr, kadroyê verî yê PKK’yî Hakî Karer cayo ke qetil bibi de, yad kerdî.

 

Rayîrşîyayîşo ke hetê Têgêrayîşê Cinîyan ê Azadan (TJA) ra Amed ra ver bi Anqara bi şîarê “Ma bi hêvîye ver bi azadîye rayîr ra şinê” semedê azadîya fîzîkî ya Rayberê Şarê Kurdî Abdullah Ocalanî dest pêkerd, roja çarine de Dîlok de dewam keno.

 

Cinî qezaya Şahînbeyî ya Dîlokî de kadroyê verî yê PKK’yî Hakî Karerî yad kerd. Cinî verê awanîya qezaya Şahînbeyî ya DEM Partî de kom bîyî û ver bi Kuçeyê Hûmara 67024 yê taxa Cengîz Topel ke Hakî Karer tîya qetil bibi, rayîr ra şî. Cinîyê ke bi qerenfîlanê destê xo de rayîr ra şî, şîarê “Bijî Serok Apo” û “Heqê hevî heqê şaran o” berz kerd. Dimayê rayîrşîyayîşî, Parlamentera Mûşî Sumeyye Boze eşkerayîye da.

 

Sumeyye Boze va ke ewro eynî wextî de serrgêra qetilkerdişê Nagîhan Akarsele ya û va: “Ewro ma sey cinîyê kurdî, tirkî, erebî, musilmanî, êzidî û yê bînan, rayîrê înan de şinê. Ma piştgîrîya têkoşînê enternasyonalî yê hevale Nagîhan, heval Hakî û hevala Emîne Erciyes kenê. Ewro bi nê rayîrşîyayîşî ma vînenê ke no têkoşîn resayo armancê xo. Ma vanê no rayîrşîyayîş do bi azadîya Rayberê Şarê Kurdî Abdullah Ocalanî tacîdar bibo. Ma têkoşînê xo dewam kenê heta Rayberê Şarê Kurdî Abdullah Ocalanî azad bibo û heqê demokratîkê ey bêrê nasnayîş. Ma vanê, bêOcalanî çareserî nêbena, bê cinîyan çareserî nêbena.”