ANQARA - Endamê Heyetê Îmraliyî DEM Partîye Pervîn Buldan, Mîthan Sancar û Faîk Ozgur Erol vizêr seba Rayberê Şarê kurdî Abdullah Ocalan reyde pêvînayîş bikerî şibî Girawa Îmraliyî. Heyet derheqê pêvînayîşî de beyanato nuştekî da û va ke Abdullah Ocalan vato ke Komara Demokratîke serê bingeyê huqûqê aştîye û demokrasîye do bêro awankerdene.

 

Endamê Heyetê Îmraliyî DEM Partîye Pervîn Buldan, Mîthan Sancar û Faîk Ozgur Erol vizêr seba Rayberê Şarê kurdî Abdullah Ocalan reyde pêvînayîş bikerî şibî Girawa Îmraliyî. Heyet derheqê pêvînayîşî de beyanato nuştekî da.

 

Beyanat de wina ame vatiş:

 

“Raya pêroyîye û Çapemenîye rê

 

3ê Citmenga 2025î de, ma Girawa Îmraliyî de Birêz Abdullah Ocalanî de teqrîben hîrê saetî û nêm pêvînayîşêk viraşt. Birêz Ocalan sey her tim bi moral, weş û bi xobawerîkê berzî bi. Ey ard ziwan ke bi Prosesê Aştîye û Komelê Demokratîkî yo ke par dest pêkerde, welat de şer û pêkewtişî vindarnayê û verê xeylêk talukeyanê girdan girewto û her kesê ke na babete de rolê xo kay kerdo, wayîrê keda bişeref û pîle yê.

 

Birêz Ocalanî va, “Şaristanî dima ra hîrê seserranê pêkewtişanê rijnayoxan û vînîbîyayîşanê pîlan ê şeranê dinya, demokrasîya muzakereyî sey modelêkê çareserîye yo muhîm aver berdo. Bingeyê na metodî ganî qandê çareserkerdişê meseleyanê Tirkîya yê zereyî û teberî esas bêro girewtiş.”

 

Birêz Ocalanî teklîf kerd ke heme munasbetanê sîyasî û komelkîyan de muzakereyo demokratîk serdest bo. Birêz Ocalanî, eşkerayîya 27ê Sibate vist vîrî û va, “Ma peyê vatişê xo de yê ke averşîyayîşê nê prosesî bestîyayeyê hewcedarîyanê sîyasî û huqûqîyan o,” û destnîşan kerd ke na merhaleyo ke ma resayo, tesbîtkerdiş û caardişê hewcedarîyanê huqûqîyan bi vînayîşêkê raştî û yewhêtî zaf muhîm o.

 

Peynîye de Birêz Ocalanî ard ziwan ke ganî seserra newîye ya Komara Demokratîke serê bingeyê huqûqê aştîye û demokrasîye de bêro awankerdene.”