ÎZMÎR - Cinîyan dîyar kerd ke waştişê înan ê sereyîn yê semedê aştîye azadîya Rayberê Şarê Kurdî Abdullah Ocalanî û veradayîşê tepişteyanê sîyasî yo. Cinîyan wina va: “Ma bi dejan pîl bîyî, ma êdî aştî wazenê.” 

 

Dimayê vengdayîşê tarîxî ke Rayberê Şarê Kurdî Abdullah Ocalanî kerd, waştişê şarê Kurdî aştî, tena bêvengkerdişê çekan nê, eynî wextî de wedaritişê tecridê giran yê Rayberê Şarê Kurdî Abdullah Ocalanî ser o û caardişê azadîya fîzîkî, veradayîşê tepişteyanê sîyasî yo. Bi taybetî cinî û dayîkan nê waştişî berz kenê. Dayîkê Aştî dîyar kerdî ke serkewtişê prosesî, girêdaye xurtbîyayîşê yewîtî û piştgîrîya şarê kurdî yo. 

 

Meryem Ataş dîyar kerd ke waştişê înan ê pîlî yê prosesî ra azadîya fîzîkî ya Abdullah Ocalanî ya û wina va: “Serekê ma bi serran binê tecridî de yo. Wa serekê ma azad bibo. Azadîya ey azadîya ma temamî ya. Na nûqte de komîsyon zaf muhîm o. Ma wazenê komîsyonanê xo virazê û cewabêk xurt bidê proses. Wexto ke ma vejênê zî têkoşînê xo dewam kenê. Ma her tim înan dir ê. Wa ê zî lezkî bêrê veradayîş.”

 

‘Wa tepişteyî bêrê veradayîş’ 

 

Nazîme Îldenîz dîyar kerd ke ê aştî wazenê ke dayîkî dej nêancê û wina va: “Ma zaf dej ant. Dejê ma giran o. Êdî wa aştî pê bêro. Wa tepişteyî bêrê veradayîş. Ma heqê xo wazenê. Ma kurd ê û wazenê wina biciwîyê. Ma ziwanê xo wazenê. Tutê ma bedelê girdî dayî. Ma heta peynî dewaya înan pawenê. Ma aştî wazenê. Wa temamê tepişteyî û serekê ma bêro veradayîş.”

 

‘Teberê aştî de waştişê ma çin o’ 

 

Mehrînaz Merhan zî dîyar kerd ke semedê serkewtişê prosesî ganî şarê kurdî bi piştgîrî û yewîtî de bê û va: “Lazim o ma temamî yew bê. Ma dest bidê yewbînan. Lazim o ma têhet de bê. Ez dayîka şehîdî ya. Teberê aştî de rayîrêk bîn çin o. Lazim o temamê tepişteyî bêrê veradayîş.”