ENQERE - Di encamnameya PM’a HDP’ê de têkildarî tecrîda li ser Rêberê PKK’ê Abdullah Ocalan wiha hate gotin: “Divê hemû derdorên sosyalîst û hêzên demokrasiyê têkoşîna li dijî tecrîdê mezin bikin û ev yek berpirsyartiyeke dîrokî ye.” 

 

Partiya Demokratîk a Gelan (HDP) encamnameya Meclisa Partiyê (PM) ya di 7’ê tebaxê de li dar xistî parve kir. Di beyannameyê de wiha hat gotin: “Ji aliyê berpirsyariya siyasî ya jinûve avakirina pêvajoya nû ve me civîneke gelekî bi bandor a Meclisa Partiyê li dar xist. Eşkere ye ku piştî hilbijartinê li tevahiya welêt ji aliyê aborî, siyasî, ekolojîk û civakî ve têkçûnek heye û ya ku di binê vê hilweşînê de tê hiştin, ji sedî 95 ê gel e, yanî kedkar û xizane ."

 

‘Ev pêvajo bi xurtî hate meşandin ’

 

Di encamnameyê de ev tespît û pêşniyar hatin kirin: “Atmosfera giran a sê mehên derbasbûyî lêgerîneke siyasî ya esasî li dijberên heyî yên rejîmê ferz dike. Ji aliyê HDP'ê ve pêvajoya sê mehên derbasbûyî, weke ku me soz dabû gelê xwe bû pêvajoyeke rexnekirin û rexnedayinê, ev pêvajo bi xurtî hate meşandin û wê hîn jî dewam bike. Pêvajoya ku bi civînên li bajar û navçeyan, civînên Desteya Rêveberiya Navendî û Meclisa Partiyê û kombûnên gel dest pê kir, di asta bajar, navçe, bajarok û gundan de bi sedan civînan dewam kir, wê bi bi komxebatên amadekariya konferansê, bi konferansan û kongreyê dewam bike. Bi qasî girîngiya nîqaşê ya piştî hilbijartinê, her wiha pêvajoya rexnekirin û rexnedayinê, destnîşankirina rêya li ser bingeha perspektîfa me ya jiyana nû gelekî girîng e.

 

'Em ê bi biryardarî têbikoşin'

 

Operasyona hilbijartinê ya desthilatdariya AKP-MHP'ê hîn jî dewam dike. Bi vê rêyê, ji bo karibe hemû partiyên siyasî li gorî xwe bi rêk û pêk bike, hêza xwe ya medya, medya dîjîtal, aborî û siyasî bi temamî xistiye nava liv û tevgerê. AKP-MHP ji bo karibe li ser desthilatdariyê bimîne, dixwaze atmosfereke siyasî biafirîne ku her tiştî bixe nava çarçoveya ku bi xwe diyar kiriye. Li hemberî operasyonên siyasî û îdeolojîk ên bi vê têgihiştinê têne kirin, em ê bi biryardarî têbikoşin.

 

'Têkoşîna hevpar a li dijî tecrîdê berpirsiyariyeke dîrokî ye'

 

HDP'ê yekitiya bindestan a vî welatî bi nasnameyeke sazî û rêxistinî pêk aniye. Qada siyaseta demokratîk bi nasname û rêxistiniya HDP'ê gihîştiye zemîneke civakî ya xurt û bi vî rengî di siyaseta Tirkiyeyê de xeteke nû hatiye destnîşankirin. Di afirandina vî fikrî de birêz Ocalan xwedî kedeke mezin e. Rakirina tecrîda li ser birêz Ocalan ji bo tevahiya gelên Tirkiyeyê wê bibe misogeriya aştiyê. Di vê çarçoveyê de ne tenê ji bo Kurdan, ji bo hemû hêzên demokratîk û sosyalîst mezinkirina têkoşîna hevpar a li dijî tecrîdê berpirsiyariyeke dîrokî ye.

 

Xurtkirina perspektîfa jiyana bi hev re

 

Civîna me ya Meclisa Partiyê ku di demeke ewçend girîng de hate lidarxistin, di rêya avakirina şoreşgerî ya dema nû de bûye gaveke girîng. Ji bo guherîn û veguherînê em ê dilsozê fikrê HDP'ê bin, ruhê têkoşer û danheviya HDP'ê bigihînin Partiya Çep a Kesk, ji bo paşerojê jî nexşeya xwe ya rê bi danhevî, têkoşîna xwe diyar bikin. Bi hêza ji paradîgmaya xwe û asoyê siyasî yê gelê xwe werdigirin, em ê wezîfeya pêşengiya demokratîkbûna Tirkiyeyê dema bê hîn bêhtir bi cih bînin. Di vê dema dîrokî de ji navê partiyê jî girîngtir, ya ku me dike em, di heman demê de cuda dike, perspektîfa jiyana nû, xeta 3'yemîn e. Em zanin ku aqlê dewletê yê bi serweriya mêr ku Kurdan, kedkaran, Elewiyan, jinan, ciwanan, sosyalîstan, demokratan, bawermendan, nasnameyên zayendî û hemû bindestan dike dijmin û aqlê dewletê yê ku tecrîdê giran dike yek e. Têkoşîna li dijî vî aqlî jî bi xurtkirina perspektîfa jiyana bi hev re dibe. Bi pêşengiya vê perspektîfê nijadperestî, neteweperestî û tecrîd ji holê dikare bê rakirin û Tirkiyeyeke demokratîk a ji bo hemû gelan dikare bê avakirin."

 

Wê kelecana şoreşgerî kêm nebe

 

Di dawiya encamnameyê de wiha hate gotin: “Em ê kelecana xwe ya şoreşgerî ji bo kêliyekê jî kêm nekin û erk û berpirsyariya afirandina civakeke rêxistinbûyî, polîtîk û civakîbûna siyaseta demokratîk hildin ser milê xwe. Partiya me wê bi vê îradeya xurt û paradîgmaya xwe, bi cewhera xwe, bi nasnameya xwe ya saziyê li gel Partiya Çep a Kesk pêşengiyê ji pêvajoya avakirinê û têkoşînê ya dema nû re bike. Ev biryara ku ji aliyê Meclisa me ya Partiyê ve hatiye wergirtin, ji bo mezinkirina fikrê HDP'ê ye. Kongreya Awarte ya 4'emîn ku em ê di 27'ê Tebaxa 2023'an de pêk bîninin, wê bibe gavek ku tecrûbe û danheviya kevneşopiya HDP'ê ji Partiya Çep a Kesk re bê ragihandin.”