NAVENDA NÛÇEYAN - Bi hezaran kes ji Efrîniyên koçberbûyî û şêniyên Şehbayê, li dijî tecrîda girankirî ya li ser Rêberê PKK'ê Abdullah Ocalan meşiyan.

 

Însiyatîfa Gel a Kantona Efrîn û Şehba ji bo şermezarkirina tecrîda li ser Rêberê PKK'ê  Abdullah Ocalan li gundê Babinisê meşek organîze kir. Di meşê de bi hezaran xelkê herêmê beşdar bû.

 

Di meşê de wêneyên  Abdullah Ocalan, pankarta 'Ey Serokê me tu yî roja me' hatin hildan.

 

Li çatrêya gundên Babinis û Til Şiîrê meşê dest pê kir û siloganên banga azadiya fîzîkî ya Abdullah Ocalan û şermezarkirina tecrîdê hatin berzkirin.

 

Li stadyûma gundê Babinisê, meş vegerî mîtîngê. Li wir endama rêveber a Kongra Star Ruweyde Ehmed tecrîd şermezar kir û got: "Em heta pêkanîna azadiya fîzîkî ya Abdullah Ocalan têkoşîn û berxwedanê dewam dikin."

 

Her wiha Ruweyde bang li rêxistinên hiqûqî yên cîhanê kir ku li hember tecrîda li ser Abdullah Ocalan bi berpirsiyariyên xwe rabin.

 

Endamê Însiyatîfa Gel a Efrîn û Şehba Nacî Selame axivî û got: "Li ser Rêbertî komployeke mezin hat meşandin. Her wiha dewleta Tirk  tevahî qanûnên navneteweyî bin pê dike."

 

Nacî hevgirtina pêkhateyan bi fikra  Abdullah Ocalan re li dijî êrişên li ser herêmê silav kir.

 

Meş bi dirûşmên şermezarkirina tecrîdê û banga pêkanîna azadiya fîzîkî ya Kurd Abdullah Ocalan bi dawî bû.