NAVENDA NÛÇEYAN - Li navçeyên Çinar û Şemrexê agir bi 17 gundan ket. Hat zanîn ku li van gundên Çinarê û Şemrexê gelek kes birîndar bûne. Li Şemrexê 9 kes jiyana xwe ji dest da.

 

Duh bi şev li gundên bi ser navçeya Çinarê ya Amedê û gundên bi ser naçveya Şemrexa Mêrdînê ve ku cîranên hev in, şewat derket. Hat zanîn ku agir ango şewat li 17 gundên vê herêmê ketiye û belav bûye. Ji ber şewatê li gundên Çinarê û li gundên li navçeya Şemrexê herî kêm 9 kesan jiyana xwe ji dest dane. Hat ragihandin ku gelek kes jî ji ber şewatê birîndar bûne û li nexweşxaneyên Amed, Mêrdîn û Rihayê tên dermankirin. 

 

Amed

 

Hat zanîn ku li van gundan şewat-agir hatiye kontrolkirin û xebatên sarkirinê didomin. Piştî şewatê vê sibehê li herêma şewatê dîmenek matmayî xwe raxist ber çavan. 

 

Bi serokatiya Hevşaredarê Şaredariya Bajarê Mezin a Amedê Dogan Hatûn rêveberiya krîzê hat avakirin. Li herêma ku Şaredariya Bajarê Mezin a Amedê lê ye şewat hat kontrolkirin. Xebatên cemidandinê didomin. Niha li herêmê 5 wesayîtên tefandina agir û 15 xebatkar xebatên cemidandinê didomînin. Her wiha Şaredariya Bajarê Mezin a Amedê 10 wesayîtên tefandina agir şandin herêma ku şewat lê didome. 

 

Yek ji welatiyên li Tobanê (Koksalan) ku yek ji gundên ku şewat derket û zerareke mezin lê çêbû, axivî û wiha got: “Ez derketim ku nivînan deynim ser ban. Saet derdora 10' ê şevê bû, zarokê min ji eywanê mitbaxê qêriya: "Agir ket." Her tişt di nav çirk û hûrdeman de çêbû. Bifikirin, ji ber şewatê me nikarîbû deriyê xwe vekin. Me qêrîn û qêrîn, lê kesî dengê me nebihîst." 

 

Welatiyên ku me li gundê Kêlekê yê Çinarê jî axivîn, diyar kirin ku ne îtfaiye ne jî ambulans di wextê xwe de hatine. Gundiyan gotin, “Me birîndarên xwe birin ambûlansa ku hat ber ketina gund. Ambûlans nehat gund. Me birîndarên xwe bi xwe re bir. Ji vî gundî çar pênc cenazeyên me hene, em nizanin mirine yan sax mane yan jî şewitîne. Em ji navenda Amedê gihiştin gund, îtfaiye, ambulans û dewletê negihîştin xizmên me. Bertek nîşanî vê yekê da. Bila ji niha û pê ve kes neyê."

 

Mêrdîn

 

Şewata ku duh danê êvarê li gundê Kelekê ya navçeya Şemrexa Mêrdînê derketibû û di encama neşandina helîkopterê de li qadeke berfireh belav bû, danê sibehê ji aliyê ekîbên îtfaiyeyê yên Şaredariya Bajarê Mezin a Mêrdînê ve hat kontrolkirin. 

 

Di şewata ku li qadeke berfireh belav bû û bi saetan dewam kir, piraniya wan ji heman malbatê 9 kesan jiyana xwe ji dest dan û gelek kes jî birîndar bûn. Di şewatê de xisarên canî û malî çêbûn, gelek heywan jî telef bûn.

 

Partiya Wekheviya Gelan û Demokrasiyê (DEM) der barê rûxandina şewatê de maseya krîzê ava kir. Ewil hewcedariyên welatiyan bi maseya krîzê ya hat avakirin hatin pêşwazîkirin.

 

Hevserokên Giştî yên Partiya Herêmên Demokratîk (DBP) Çîgdem Kiliçgun Uçar û Keskîn Bayindir, parlamenterên DEM Partiyê yên Mêrdînê, hevserokên DEM Partiyê yên Mêrdîn, Amed, Êlih (Batman), Şirnexê hatin taxa Kelekê ya ku herî zêde ji şewatê bandor bû. Di saetên sibê de û hevgirtina welatiyan pêk hat.

 

Ji kesên di şewatê de jiyana xwe ji dest dabûn 2 kes li Kelekê bi tilîlî û duayan hatin definkirin.