Nazlican Nûjîn Yildiz

 

ÎZMÎR – Îdarekara Dergaha Elewî ya FEDA Leverkusen Meryem Çagli dîyar kerd ke hêrişê hemverê elewî, durzî û kurdanê Sûrîye fehmê yewperestî ra qewimyenê û va ganî heme şar û bawerî hemverê hêrişan wurzê û aştîye bipawê.

 

Çeteyê girêdayeyê Hukmatê Demkî yê Şamî ke 6ê çeleyî de hemverê taxanê kurdan yê Şêxmeqsûd û Eşrefîye kerdibî dewam kenê. Bi mîyançîya raya pêroyî ya mîyanneteweyî adirbest ame îlankerdiş û her di taxî de sivîlê birîndarî ameyî tehliyekerdiş. Pêwa nê seyine kesî ke mîyan de cinî û tutî zî estbî hetê çeteyan ra ameyî remnayîş. Aqûbetê kesê ke ameyê remnayîş nîno zanayîş.

 

Îdarekara Dergaha Elewî ya Leverkusen ya girêdayeyê Federasyonê Elewiyan ê Demokratîk (FEDA) Meryem Çagli derheqê hêrişê HTŞ’yî yê hemverê kurd, elewî û durzîyan de qisey kerd û da zanayîş ke Sûrîye de sebebê hedefgirewtişê şaran awankerdişê fehmê yewperestî yo û bi nê hêrişan hewl yeno dayene ke vengdayîşê Rayberê Şarê Kurdî Abdullah Ocalanî yê ‘aştî û cimatê demokratîkî’ veng bêro vetiş. Meryem Çagli dîyar kerd ke hemverê nê ganî hemî şar û bawerî aştîye bipawê û hemverê hêrişan de wurzê lingan ser.

 

‘HTŞ eşteyê DAIŞî yo’

 

Meryem Çagli dîyar kerd kerd ke hêrişî tesaduf nîyê û plankerde ameyê kerdiş û proses dewam keno hewl danê açarnê hawirê şerî. Meryem Çagli wina ard ziwan: “HTŞ eşteyê DAIŞî yo. HTŞ bi vurnayîşê name û cilî vurnayîş nêciwîyêno. Hemverê HTŞ û DAIŞ’î de her tim kurdî bîyî. Kurdan şer kerd. Her kes deyndarê kurdan bî. Ê ke hemverê hêriş û qirkerdişî vindert têkoşînê kurdan bi. Bi taybetî çira elewî hedef ameyî girewtiş? Wazenê fehmê yewperestî awan bikerê. Semedê nê zî wazenê kurd, elewî û Durzîyan bipelçiqnê û tasfîye bikerê. Na rewşe destkewtişê cimatî û sîyasî yê kurdan hedef gêna. Yanî no sey cezakerdişê kurdan o. Hêrişê yenê kerdiş zor û zext o. Ma elewî tena Sûrîye de nê qirkerdişan nêdî. Ma Mereş, Sêwas, Dêrsim, Çorum de zî ciwîyayî. Labelê ma çin nêbî. Ma nêpelçiqîyayî. Ma semedê aştîye têkoşîn kerd. No serrêke yo prosesê aştîye est o. Semedê nê veng vejê, Sûrîye kerdî mîyanê şerî. Semedê aştîye her kes çi destê înan ra yeno kenê. Ma do nêbî hacetê nê.”

 

‘Ma do vengdayîşê Birêz Ocalanî veng nêvejê’

 

Meryem Çagli dîyar kerd ke kurdî tu dem hetê şerî nêbîyê û wina va: “Her çî destê ma ra ame girewtiş. Hewl dayî kurdan asîmîle bikerê. Hewl dayî bawerîya înan çin bikerê. Labelê bi serran o ma têkoşîn kenê. Ma şer nêwazenê. Ma hemverê hêrişan sere nêtewênenê. Çi destê ma ra bêro ma do bikerê. Ma do keyeyê xo de nêroşê. No şar tena nîyo. Ma dinyayêke bê Rojawanî nêwazenê. Do hesabê nê zilmî bêro dayîş. Vengdayîşê Birêz Ocalanî semedê cimatêko demokratîk û aştîye bî. Ma heta peynî pey nê vengdayîşî de yê. Ma çareserîya demokratîke wazenê. Ma nê de bi israr ê. Do şar para xo nê ra bigîro. Tena kurdî nê, ma şarê tirkî ra zî ewnîyenê. Dayîkê tirkî zî yê kurdî zî bermenê. Eke Tirkîya bikewo mîyanê şerî do tehlukeyêk gird bêro ciwîyayene. Semedo no tehluke awan nêbo, semedê aştîye çi destê ma ra bêro ma do bikerê.”

 

‘Ganî semedê dinyayêka bêşer ma destê xo bidê yew’

 

Meryem Çagli sewbîna da zanayîş ke hêrişê HTŞ’yî bi armancê vengvetişê vengdayîşê Rayberê Şarê Kurd Abdullah Ocalanî yo û wina peynîya vatişê xo ard: “Ez venga raya pêroyî yê dinya kena. Wa her kes wîcdanê xo goşdarî bikero. Gelo nê çîyê ke yenê kerdiş heq o? No cimat nê heq keno? Hemverê nê hovîtî de bêveng memanê. Semedê dinyayêke bêşer bêrê ma destê xo bidê yewbînan.”