STENBOL - Endama Egîtîm-Senî Zeynep Torun dîyar kerd ke semedê tutê ke bi ziwanê xo nêeşkenê perwerde bivînê, mufredatêk newe û aştîyane wazenê û wina vatî: “Ganî bi hawayêko têduşt heqê perwerdeyê bi ziwanê dayîke semedê her kesî bêro dayîş.”

 

Bi seserran o bi mîlyonan kurdî heqê pewerdeyê bi ziwanê dayîke bêpar yenê verdayîş. Polîtîkayê asîmîlasyonî yê TC pê ano, benê sebebê ke tutî ziwan û nasnameyê xo ra durî bikewê. Tutê ke sîstemê yewpawitiş de pîl benê, bi tehlukeyê ke ziwan û nasnameyê xo vînî kenê dir yenê rî bi rî. Bi vengdayîşê ‘Aştî û komelê demokratîkî’ ke Rayberê Şarê Kurdî Abdullah Ocalanî 27ê Sibate de kerd de prosesêk newe semedê şarê kurdî û tirkî dest pêkerd. Sekretera Cinîyan a Şaxa Hûmara 8ine Egîtîm Senî ya Stenbolî Zeynep Torun derheqê babete de qisey kerd û va, ê mufredatêk aştîyane wazenê.

 

‘Ganî heqê ziwanê dayîke bêro nasnayîş’

Zeynep Torun wina qa kerd: “Tirkîya de seserre yo problemê perwerdeyê bi ziwanê dayîke est o. Ganî semedê her welatî bi hawayêko têduşt no heq bêro dayîş. Ziwanê dayîke semedê her kesî muhîm o. Tutî xo bi ziwanê dayîke îfade kenê û têkilîyê xo wina danê ro. Tute hema pîzeyê dayîka xo de nasnameyê xo vejena werte. Nika tutê 6 serre şinê pêşdibistan û 7 serre sî şinê sinifa ewilî ya dibistana sereyîn. Na sewîyeya krîtîk de tute nêeşkena bi ziwanê tewrê perwerde bibo. No zî beno sebebê xeylêk probleman.”

 

‘Binê berpirsyarîyê dewlete de yo’

 

Zeynep Torun dewam de wina va: “Welatê ma de xêrcê tirkî xeylêk ziwanê ke yenê qiseykerdiş est ê. La çi heyf îmkanê perwerdeyî nîno dayîş. Nê binê berpirsyarîyê dewlete de yenê kerdiş. Ganî nê heqî bêrê dayîş. Ez 18 serrî yo sey mamoste sektorê perwerdeyî de ya. Mi bi ziwanê xo perwerde nêgirewto. Ez sinifa yewine de tirkî musaya. No rayîr ver bi problemê cidî akerd. Ganî ma sey şarê kurdî vernê de bi ziwanê xo qisey bikerê.”

 

‘Ganî mufredat de vurnayîşê cidî bêrê kerdiş’

 

Zeynep Torun dîyar kerd ke ganî mufredat de vurnayîşê cidî bêrê kerdiş û wina peynî kerd: “Ganî şêrê vurnayîşêl cidî yê mufredatî. Ganî şêrê mufredatê aştîyane. Ganî fek polîtîkaya yewziwanî ya madeya 42ine ya desturê bingehîn ê 1982ine ra vera bidê. Ganî mufredat newe ra bêro amadekerdiş.”