Pelşîn Çetînkaya

 

ÊLIH - Gulîstan Tara, ke serewedaritiş û rêwîyê xo yê xoverdayîşî de bi qelema xo rastî vila kerd, bî vengê şarê bindest. Gulistan Tara ke cayê xo zerrîya cinîyanê ke azadî gêrenê de viraşt, bi têkoşînê xo semedê her kesî bî nimûne.

 

Gulîstan Tara ke qet fek têkoşînê xo ra vera nêda, serra 1983ine de Êlih de dayîke ra bî. Gulistan Tara ke keyeyêk welatparêz de dayîke ra bî, 10 wayê û bira yê. Dibistana sereyîn, mîyanên û amadeyî bajarê xo de qedêna. Semedê şexsê xo yê xoverdayox, hesas û dilovan, Gulistan Tara bi israr dîyar kerd ke bawerîya xo bi qada neqlkerdişî ana û xeylê rey vana ke problem çinîyo ke aye çareser nêkero. Temamê cuya xo de aye semedê şarê ke rastê; nêheqî û polîtîkayê çinkerdişî dir ameyê, têkoşîn kerdê. Bi tesdîqkerdişê têduştî, demokrasî û azadî ke prensîbê ci estbî, Gulistan Tara 16 serrîya xo de gama yewine raywanîya xo ya têkoşînî de eşt.

 

Gulîstan Tara bi veng û qelema xo ya semedê rastîyê ke şarê xo neql kerd, bî hedefa dewleta tirkan û 23yê tebaxa 2024ine de başûrê Kurdistanî de qezaya Seyîdsadiqê Silêmanî de netîceya hêrişê teyareyê bêmerdim de dinyaya xo bedelnaye.

 

Waya Gulîstan Tara ke bi xoverdayîşê xo bîya nimûne Dîcle Erdem têkoşînê aye qalî kerd.

 

'Gulistane dir rûhê têkoşînî vernî de bî’

 

Dîcle Erdem, dîyar kerd ke Gulistan Tara pêro meseleyan rê hesas bî û nê ruhê têkoşînî zerrîya aye de aver şî û va: "Aye zaf raşt, bi nîyetê baş û hesas bî. Nê semedî ra hem hevalê aye û hem zî ma ci ra hes kerdêne. Aye zîrek û xemxur bî. Aye tutîya xo ra şahidîya hedîseyê komelî û hem zî nêheqîyan rê kerdêne. Bi nê rengî, ruhê têkoşînî yê ke semedê nêheqî antê, pêro cinîyanê kurdan de aver şî, Gulistane de zî aver şî. Aye nê hema emrê xo yê qijî de hîs kerd. Heta korîdorê dibistane de zî aye hevalanê xo dir tewrê nê têkoşînî bî. Gulistane wareyê tîyatroyî de wayîrê hunerî bî. Tîyatro aye rê semedê rayîrêk bî ke serewedaritiş bikero û vengê xo berz bikero. Beno ke bi nê rengî rayîrê xo yê famkerdişî da destpêkerdiş. Aye kitab wendêne ke waştêne nêheqîyê sîstemî fam bikero û Têgêrayîşê Azadîya Kurdî nas bikero."

 

'O rayîrêk xobîyayekerdiş bi'

 

Dîcle Erdem, dewam de wina va, "Ma endamê keyeyêk kurdî bî ke des tutî ci de estbî. Ma demê xidarî derbaz kerd. Demê destbendkerdiş û tepiştişî estbî. Bêşik nê pêro tesîr Gulîstane û ma ser kerd. Nê faktorî rolêk muhîm kay kerdî ke tewrê têkoşînî bibo. Rojêke, Gulistane ma ra visîya û tewrê têkoşînî bî. Beno ke no semedê aye nuqteyêk destpêk û raywanîyêk xofamkerdişî bi. Ma her game dûrî ra  televîzyonî ser, bi qaso ke ma eşkayîne temaşe kerdêne. Aye bi rastî bêkîbr bî. Semedê ma rûmetêk pîl bî ke ma bivînê ke kesêke, taybetî cinîyêke, cuya xo dana ke rehetiya xo fam bikero ke cigêrayîşê xo yê bîyayîş û têkoşînê cinîyê bînan bivîno û hewl bido nînan dinya dir pare bikero. Aye şahidiya têkoşîn û xoverdayîşê Kobanê û qirkerdişê Şengalî kerd. Aye hewl da ke nînan dinya dir pare bikero û a zaf bi qîmet bî."

 

'Aye xo zerrîya cinîyanê bindeste de awan kerd'

 

Dîcle Erdem wina va, "Gulistane ma dir nêbî, la aye xo zerrîya xeylêk cinîyanê bindest û îstismarkerde de awan kerd. Bêşik, kîşta xemgînî de bextewarî û rûmetê ma ya. Gulistane nê rayîrî semedê hemverê polîtîkaya dewlete ya çinkerdişî de weçîna. Ma sey kurd dayîke ra bî û ma kurd ê. Ziwanêk, kulturêk û adetêk ma est o. Ganî heqê ma yê tewr xozayî bîne ke ma nê bipawê û biciwîyê. Çi heyf, ma raştê qirkerdiş û mergî ameyî. No çî bêşik beno sebebê şiktişê merdiman û averşîyayîşê wareyêk têkoşînî. Beno ke têkoşînê kurdî, Têgêrayîşê Azadîya Kurdî, eke sîstem hende zordar nêbîne, nê rayîrî nêweçînayîne. Semedo ke wexto ke merdimî semedê rijnayîşî yenê çinkerdiş û yenê peygoşkerdiş, ê wazenê newe ra bibê. Na rewşe têkoşîn sey reaksîyonê hemverê nê pêrûne aver şî.”

 

'Ma do mîrasê aye yê têkoşînî dewam bikerê'

 

Dîcle Erdem qiseykerdişê xo wina peynî kerd: "Gulistane bî vengê cinîyanê kurdan û pêro cinîyê ke azadî gêrenê. Aye hewl da nê caardişan biresno dinya, têkoşînê cinîyê ke kerdê waşt bido nasnayîş.  Belê, aye ewro êdî ma dir nîya, la bi hezaran heval û hemrayê aye estê ke aye temsîl kenê. Ma zaf keyfweşê ke ma her çî kenê ke mîrasê aye yê têkoşînî dewam bikerê.”