AMED - Rabîa Ataş, dayîka tepişteya nêweşe Şîvekar Ataşe va ke demê peyîn de zext û şîdetê zîndanan zêde bîyo û veradayîşê tepişteyan yeno astengkerdiş. 

 

Seranserê zîndananê Kurdistan û Tirkîya de binpaykerdişê heqê merdiman dewam keno. Goreyê dayeyê raporê Komeleya Heqê Merdiman (ÎHD) ya 2025ine, 335 tepişteyê nêweş ê giranî est ê. Nînan ra 230 kesî nêeşkenê bi tena sereyê xo biciwîyê, 105 kesî zî hewceyê destekî yê û 188 kesî zî semedê nêweşîya xo hewceyê çimdarîyê domdar ê.

 

Dimayê vengdayîşê tarîxî yê Rayberê Şarê Kurdî Abdullah Ocalanî yê 27ê Sibate de, xeylêk koman qetî kerd ke ganî dewlete ewilî tepişteyê nêweşan û tepişteyê sîyasîyan vera bido. Nê prosesî de, goreyê raporê ATK'î, heqê dermankerdişê tepişteyanê nêweşan rê nîno dayîş û hema zî Heyetê Îdarî û Çimdarî bi sebebê keyfî yê sey "rewşa înan baş nîya" veradayîşê înan asteng kenê.

 

Şîvekar Ataş, tepişteyêka nêweşe ya giran a û Zîndanê Cinîyan ê Girewteyê Bakirkoyî de tepişte ya. Pêwa ke nêweşîya qelbî aye dir est o, nîna dermankerdiş. Dayîka Şîvekar Ataş, Rabîa Ataş, proses û nêveradayîşê tepişteyanê nêweşan ser o ajansê ma rê qisey kerd.

 

Rabîa Ataş, dîyar kerd ke zext û şîdetê Zîndanê Bakirkoyî yê Stenbolî zêde bî û va: "Kênaya mi Şivekar Ataş yew nêweşa giran a. Par, veradayîşê di hevalên aye ke 30 serrî yo tepişte yê, serrêke derg kerdî. Nika înan nê hîrê aşmî û nîmê bînî derg kerdî. Bi no hewa rayîrê veradayîşê tepişteyanê bînan yeno padayîş.”

 

Rabîa Ataş, wina va: "Herêmê pawitişê medyayî hema zî yenê bombavarankerdiş. Tutê ma uca de dinyaya xo bedelnenê. Dewlete şerêk lêşin kena. Şîdet zîndanan de zêde bîyo. Nêweşê giranî est ê. Kênaya mi dir nêweşîya qelbî est a û ganî nika zîndan ra vejîyo. Aye her tim rayîr de ya semedê nêweşxane. Derzenanê qelbî danê.”

 

Rabîa Ataş, va ke PKK'yî gamê ver bi prosesîyê eşt ê û va: "La ê komîsyon ra persenê û paweyê gamêke yê. Eke çîyêk baş vejîyo teber, ma do pêro bi hêvî bê. Eke çîyêk nêvejîyo werte û hewl bidê prosesêk berê, raya pêroyî do qebûl nêkero. Nika, her kes paweyê na aştîye yo."