MERKEZÊ XEBERAN - Ame neqlkerdiş ke cinîyêke sînorê îdareyê Soranî de netîceya şewatî de, dinyaya xo bedelnaye. La sebebê hedîse nêame zanayîş.

 

Goreyê agahîya ke çimeyêke Rojnewsî rê ameya neqlkerdiş, mamostaya bi nameyê Awat Mihemed Kerîm, vernîya 4 rojan wexto ke keyeyê xo yê bajarokê Çomanî de bî, veşaya û wedarnayê nêweşxaneyê lezgîn ê Rojawanê Hewlêrî.

 

Goreyê eynî agahîyan, Awat Mihemed Kerîm semedê birînanê xo yê giranan, vizêr şan de nêweşxane de dinyaya xo bedelnaye.

 

Eynî çimeyî dîyar kerd ke Mamosta Awat şarê cayê Biradostyî bî, la badê zewacî bajarokê Çomanî de ciwîyayîne û dibistana têkelî ya Mamî Xelanî de mamosteya beşê zanistî bîye.

 

Rojnewsî hewl da ke agahîyanê hîna hîra bigîro la çimeyî zêdeyêr agahî nêda. Nê semedî ra sebeb û şiklê veşayîşê Awat Mihemed Kerîm nîno zanayîş. Rojnewsî babete ser o cigêrayîş dayo destpêkerdiş.