AMED - Goreyê çarçewaya çalakîyê 8ê Adare Roja Cinîyanê Kedkaran ê Dinya Şaredarîya Peyasî serdayîşê cinîyê ke atolyeyê tekstîlî de xebityenê, kerd. Vilê ke amade kerdibî, cinîyan rê vila kerdî. Cinîyan dawetê mîtîngî kerdî û semedê mîtîngê 8ê Adare zî pîya pankartêk amade kerdî.

 

Şaredarîya Peyasî xebatê xo yê semedê 8ê Adare Roja Cinîyanê Kedkaran ê Dinya û amadekarîyê mîtîngî dewam kena. Hetkarê hemşaredaran, Encûmenê Meclîsê Şaredarîye, Mudurîya Polîtîkayê Cinîyan û Meclîsê Cinîyan yê Şaredarîye qezaya Peyasî de, serdayîşê cinîyê ke atolyeyê tekstîlî de şuxilênê, kerdî. Serdayîş de xebatê Cinîyan û têkoşînê înan ame qalkerdiş, vilê ke amade kerdibî, cinîyan rê vila kerdî û semedê mîtîngê cinîyan ê 8ê Adare zî dawet kerdî.

 

Semedê mîtîngî pankart viraştî

 

Hemşaredara Peyasî Bêrîvan Gulşen Sîncar, encûmenê meclîsî, hetkarê hemşaredaran,  Mudirîya Polîtîkayê Cinîyan û Meclîsê Cinîyan yê Şaredarîye bi destê xo wareyê sera û şitildayîşê Şaredarî de vilan amade kerdî ke roja 8ê Adare cinîyan rê vila bikerê. Eynî çarçewa de semedê amadekarîyê mîtîngî yê 8ê Adare ke Meydanê Îstasyonî de bêro organîzekerdiş, Bazarê Keda Cinîyan ê Şaredarî de cinîyan dir pankartêk amade kerdî.