AMED - Endama Komîteya Amadekare Delal Ozbey semedê mîtîngê 8ê Adare Roja Cinîyanê Kedkaran ê Dinya ke Meydanê Îstasyonî yê Amedî de do bi sloganê "Ma hemverê qirkerdişê cinî sere wedarnenê, ver bi azadîye rayîr ra şinê" bêro organîzekerdiş, vengdayîş kerd û vat, "Semedê aştîye ma amade yê ke her çî bikerê. Nê semedî ra ma Meydanê Îstasyonî de paweyê şima yê ke 8ê Adare ko bikerê."

 

Amadekarîyê semedê 8ê Adare Roja Cinîyanê Kedkaran ê Dinya ke do emser bajaranê Kurdistan û Tirkîya de bi sloganê "Ma hemverê qirkerdişê cinîyan sere wedarnenê, ver bi azadîye rayîr ra şinê” bêro  pîrozkerdiş bêmabêne dewam kenê. Çarçewaya 8ê Adare de do xeylêk bajaran de tarîxê cîya de mîtîngî bêrê organîzekerdiş. Yew bajaro ke do mîtîng ci de bêro kerdiş zî Amed o. Pêro amadekarîyê mîtîngê 8ê Adare Meydanê Îstasyonî de qedîyayî.

 

Derheqê amadekarîyan de endama komîteyê amadekarî ya mîtîngê Amedî ya 8ê Adare Roja Cinîyanê Kedkaran ê Dinya Delal  Ozbey ercnayîşêk kerd.

 

'8ê Adare tarîxê têkoşînê cinî de yew roja tewr muhîm a'

 

Delal Ozbey tewr verê muhîmîyê 8ê Adare qal kerd û vat: “Roja ke gerdûn awan bîya û nata her hetê cuye de sere de ekonomî, komelî, kultur, perwerde, felsefeyî de dewlemendîyêk zanistî û erc awan kerda.  Ma zanê ke tena semedê cinsê biyolojîkî yê cinî nê, eynî wextî de cinî çîyan awan kena ser o zî hêriş est o. Nê semedî ra 5 hezar serrî yo hemverê cinsperestî û kolonyalîzmo ke hetê sîstemê pederşahî ra ameyo awankerdiş, sey sloganê ‘Jin, jiyan, azadî’, semedê azadîya cuye, têkoşînê azadîye kena. 8ê Adare roja ke cinî rêxistin bîyî, azadîya xo bi rêxistin kerdî û îdiayê xo yê cuyêke senîn wazenê ardî ziwan."

 

'Ma hewl danê mîtîng meydanê ke ma bieşkê biresê şarî organîze bikerê'

 

Delal Ozbey derheqê amadekarîyê xo de na agahî pare kerd: “Ma 17ê Sibate de komîteya amadekarî awan kerd. A roje ra nata amadekarîyê ma yê semedê 8ê Adare bi pêro lezê xo dewam kenê. Vernîya her çî ma semedê mîtîngê 8ê Adare muracat kerd. Ma mîtîngê xo bi sloganê, ‘Ma hemverê qirkerdişê cinî sere wedarnenê, ver bi azadî şinê’ amade kerd. Aktîvîstê TJA'yî Gultan Kişanak, Ayla Akat Ata, Verfeka Meclîsê Cinîyan ê DEM'î Halîde Turkoglû sey qiseykerdox beşdar benê û Rojda zî do sey hunermende bêro.”

 

'Semedê kokerdişê 8ê Adare ma Meydanê Îstasyonî de paweyê şima yê'

 

Delal Ozbey badê mesajê Rayberê Şarê Kurdî Abdullah Ocalanî yê 27ê Sibatê de bale ant serê muhîmîyê rolê cinî û waşt ke na çarçewa de pêro cinî meydanê mitîngî de bê û wina vat: “Ma pweyê ke pêro cinî bêrê meydanê mitîngî. Ma semedê awankerdişê komela demokratîke ya esasê jîneolojî ser têkoşînê azadîya cinî kenê û paweyê ke cinî 8ê Adare de ma dir nê kelecanî biciwîyê. Ma sey cinî aştîye rê amade yê. Ma amade yê ke semedê aştîye her çî bikerê. Ma zanê ke rolê cinîyan prosesê aştîye de çiqasî muhîm o. Ma paweyê ke nê prosesê muhîmî de cinî ma dir meydanê 8ê Adare de bi tilîliyê xo bikerê xo verike.”