MERKEZÊ XEBERAN - Roja 53ine xoverdayîşê awbendê Tişrînî de, karwanê kantonê Firatî nobetdarîya awbendî bi eşkerayîyêke dewrê karwanê kantonê Cizîrî kerd.

 

Çalakîya nobete ya Awbendê Tişrînî roja 53ine de dewam kena. Şarê kantonê Firatî (Kobanê, Eyn Îsa û Sirînê) ke 25ê sibate de nobete dewr girewtibî, ewro bi eşkerayîyêke dewrê karwanî yê kantonê Cizîrî kerd.

 

Eşkerayîya dewrgirewtişî heyê endamê Meclîsê Şarî yê Kobanê Gêlo Hisên û endamê Meclisê PYD’yî yê bajarê Hesekî Remezan Fetah ra bi ziwanê kurdkî ame wendiş. Gêlo Hisên da zanayîş ke xoverdayîşê awbendê Tişrînî 53 rojî pey xo de verda û dîyar kerd ke pêro pêameyê herême cayê xo nê xoverdayîşî de gênê.

 

Gêlo Hisên dewamê eşkerayîye de dîyar kerd ke senî Şorişê 19ê Temmuze mezgê şarî de kulturê xoverdayîşî awan kerdo, do xoverdayîşê awbendê Tişrînî zî heta peynî dewam bikero.

 

Gêlo Hisên tewr peyîn de vat: “Ma xatir şarê ma yê kantonê Cizîrî ra wazenê û nobedarîya awbendî dewrê înan kenê û vanê, xoverdayîş ciwîyayîş o.”

 

Karwan, kantonê Firatî de bi sloganê “Bijî berxwedana QSD, YPG û YPJ’ê” ame oxirkerdiş.