QERS - Hemşaredara Qaxizmanî Guner Hatay reaksîyon vera tayînkerdişê qeyûmî mojna û dîyar kerd ke tayînkerdişê qeyûmî hemverê huqûqî yo û vat: "Qerarê ke ame dayîş nasnêkenê û do hemverê qerarî de xo ver bidê." 

 

Wezaretê Karê Zereyî Şaredarîya Qaxizman ê Qersî yê DEM Partî qeyûm tayîn kerd. 20ê sibate de bi îdiayê “endamîya rêxistine” 6 serrî û 3 aşmî cezaya hefsî Hemşaredar Mehmet Alkan amebî birnayîş. Awanîya şaredarî hetê polîsan ra amebî ablûqakerdiş. 

 

Derheqê tayînkerdişê qeyûmî de Hemşaredara Qaxizmanî Guner Hatay ajansê ma JINNEWS'î rê qisey kerd. 

 

Guner Hatay bale ant serê cezaya ke hemşaredar Mehmet Alkan amebî birnayîş û vat: "Heta aşmêke yan zî di hewte, lez dayî prosesê dadgehe. Xo rê sûc îcad kerdî, zemînê eştişî amade kerdî û nê ser de qerar girewtî. Mehmet Alkan roniştişê peyîn de semedê şert û mercê hewayî bi rayîrê avûkatê xo sebeb da dadgehe. Pêwa ke destpêk de sebeb qebûl kerdî zî hela şanî saete 17:00ine de qerar dayî, pêwa ke hemserek bi xo nêeşka beşdar bibo. 6 serrî û 3 aşmî cezaya zîndanî ci rê birnayî. Ma û şarê xo nê qerarî sey sebeb semedê tayînkerdişê qeyûman vînenê. Hema vaje prosesê weçînayîşî û nata şarê ma semedê qiseykerdişê qeyûmî yê qezaya ma binê tedaya psîkolojîkî de ya."

 

'Desteserkerdişê şaredarî huqûqî nîyo'

 

Guner Hatay, dîyar kerd ke badê qerarê înan şaredarî de nobet girewtî û wina vat: "Badê bendewarîyê ma yê 4 rojan, bi şewe saete 02.00ine de dorê awanî girewtî û qerar ma rê neql kerdî û ma ra vatî ke ganî awanîya şaredarî veng bikerê. Hevalê ma reaksîyonê xo hemverê nê qerarî de ardî ziwan û înan nê qersrî qebûl nêkerd. Mehmet Alkan ard ziwan ke no qerar û desteserkerdişê şaredarî huqûqî nîyo."

 

'Ma do xo ver bidê'

 

Guner Hatay, dîyar kerd ke no reya ewilî nîyo ke qeyûm tayîn kenê û wina vat: “Do no zêdeyêr bibo. La ma tu wext fek têkoşînê xo ra vera nêdanê. Ma pêro hemrayanê xo dawetê têkoşînî kenê. Bi taybetî nê hewteyê ke pîrozbayîyê 8ê Adare yenê organîzekerdiş de yewin partîya ke nê welatî de reaksîyon vera kiştişê cinîyan mojnaya, ma yê. Na babete de ma venga pêro hevalanê cinîyan kenê ke hemverê sîstemî de xo ver bidê û têkoşîn bikerê.”