ANQARA - Serekwekîla Koma DEM Partîye Gulîstan Kiliç Koçyîgît da zanayîş ke do mîyanê çend rojan de do heyetê înan şêro zîndanê Îmraliyî û vat: “Badê nê pêvînayîşî do birêz Ocalanî dir tarîxê vengdayîşî bêro dîyarkerdiş.”

 

Serekwekîla koma Partîya Têduştî û Demokrasî (DEM Partî) Gulistan Kiliç Koçyîgît Meclis de derheqê averşîyayîşê rojeve de ercnayîş kerd. Gulistan Kiliç Koçyîgît, sere de reaksîyon vera tayînkerdişî qeyûmî yê Şaredarîya Qaxizmanî mojna û tayînkerdişê qeyûmî sey “derbeyê sîyasî” ercna. Gulistan Kiliç Koçyîgît, vat: “AKP hewl dano bi darê zorî şaredarîyan bi dest bikero. No, operasyono talankerde yo. Desteserkerdişê îradeyê şarî yo, zordestî yo.” 

 

'Tehemûlê xizmetê hevalanê ma nêkenê'

 

Gulistan Kiliç Koçyîgît wina dîyar kerd: “Semedo ke qeyûman tayîn bikerê, ceza danê hemşaredaran. Prosesê hukmî rê lezî danê, dosyayan kenê rojeve û bi şahidê nimite û fermanî ser bi destê dadgehê herêmî cezayan danê hevalanê ma. Badê zî qeyûman tayîn kenê. Çira hende ecele kenê? Semedo ke eceleyê AKP’yî est o. AKP tehemûl nêkeno ke çimeyê semedê şarî bêrê xerckerdiş. Tehemûlê xizmetê hevalanê ma nêkenê. AKP hukm sey hacetêk şuxilneno. Ma venga nê dadgeran danê; madem şima hende binê fermanê AKP’yî de yê o wext cibeyê xo vejê û bêrê mîyanê AKP’yî de sîyaset bikerê. Eke cesaretê şima bibo bêrê hemverê ma bibê namzet.

Do pêvînayîşê hîrêne bêro kerdiş

 

Heyetê ma do mîyanê çend rojan de şêro Îmrali. Seba nê serepirodayîşanê xo yê ke lazim ê ewro yan zî siba do bikerê. Nê pêvînayîşî de do derheqê zîyaretanê ke Başûrê Kurdîstanî de bîyê û munaqeşayê ke uca de ameyê kerdene, Birêz Ocalanî reyde bêrê parekerdene. “Nê pêvînayîşî ra pey do teqwîmê vengdayîşê tarixî ke do Birêz Ocalan reyde bêro kerdiş, dîyar bibo. Çareserkerdişê meseleyê Kurdî de do destpêkê serdemêko newe bibo. Ma zanê ke vengdayîşêko tarîxî do bêro. Tayê pratîkê ke wazenê vernîya îtîfaqê Kurd û Tirkan bigîrê ganî hetê komele ra bêrê mehkumkerdene.”

 

Meclîsî rê vengdayîş

 

Wexto ke vengdayîşo tarîxî ame kerdene ganî meclîs zî sey berpirsîyarêk têbigêra, destê xo dekera binê kerra û seba ke lazimtîyanê nê vengdayîşî bîyara ca ganî bi lez dest bi karî bikera.”