AMED- 8ê sibate de Amed de seba mîtîngê ke bi sloganê ‘Azadî seba aştî’ beno, beyanat ame dayene. Ame vatene ke ganî problemê ke bîyê kangren çareser bibê û ame vatene ke ‘Ma pîya azadîye bîyarê.’

 

Komîteya Organîzasyonî, seba mîtîngê ke 8ê sibate de Meydanê Îstasyonî de bi sloganê ‘Azadî seba aştî’ beno, awanîya DEM Partî ya Amed de beyanat da.

 

Hemşaredarê DEM Partî yê Şaristanî Abbas Şahînî vat ke problemê ke seserrî yo ke Rojhelatê Mîyanênî de çareser nêbenê bîyê kangren û wina vat: “Ganî şarî êdî seba aştîyêka şerefin bibê yew. Nê problemî êdî resayê astayêka ke kes êdî tehemul nêkeno. Ganî êdî nê problemê ke seserran ra yenê û bîyê kangren çareser bibê.”

 

‘Ma pîya azadîye bîyarê’

 

Abbas Şahînî dîyar kerd ke ganî aştîyêka şerefine hetê muhatabî û terefanê xo ra şertanê seypêyan de û hetê şarî ra bêro paştîdayene û wina vat: “Seba çareserîya demokratîke ya meseleyê kurdan, muzakereyo azad û seypê lazim o. Ma do Amed de bi slogana ‘azadî seba aştî’ mîtîngêk organize bikerê. Lazim o ke Amed de şarê ma reyde xebatî bibê ke şertê aştî amade bibê. Ma veng danê pêro şarê xo ke 8ê sibate de hem bêrê mîtîngî hem zî xebatan. Ma pîya azadî û aştî peyda bîyarê.”

 

‘Kurdistan de wa aştî bibo’

 

Hemşaredara DBP ya Şaristanî Sultan Yaray vat ke ganî xoverdayîşo ke şarê kurdî seba aştî dano êdî bireso azadîye. Sultan Yaray dîyar kerd ke êdî tehemulê şarê kurdî nêmendo û wina dewam kerd: “Sey ke ma vizêrî Esenyurt de kerd, ma do Amed de zî mîtîng bikerê. Çaresernêbîyayîşê meseleyê kurdî tena problemê kurdan nîyo, problemê Tirkîya yo zî. Sey ke şima zanê kurdan tim vengê xo seba aştî berz kerdo. Ma wazenê ke Kurdîstan û Rojhelatê Mîyanênî de aştîyêka daîmî peyda bibo. Ma destê xo bidê yewbînan û astengîyanê vernîya aştî de orte ra wedarnê. Wa hepisxaneyî ê kesan reyde ke aştî wazenê pir nêbê. Coka ma 8ê sibate de Meydanê Îstasyonî de vengê xo biresnê heme dinya. Ma veng danê heme şarê xo ke aştî wazeno. Wa her kes tewrê mîtîngî bibo.”