WAN - Kooperatîfê Cinîyan ê Evîne yê Wanî ame awankerdiş, semedê cinîyan wareyê îstîhdamî awan keno û heto bîn ra zî pawitişê cil û belgê herêmî bi têkoşîn dewam keno. Îdarekara koperatîfî Yildiz Çetîn dîyar kerd ke cinî do yewbînan girewtiş, binê pêro zor û zehmetîyan wurzê.

 

Semedê bidestkerdişê ekonomî û tewrbîyayîşê cuya komelî ya cinîyan rolê kooperatîfbîyayîşî pîl o. Kooperatîfê cinîyan semedê cinîyan wareyê îstîhdamî awan kenê û tewrê wareyê cuya komelî benê.

 

Wan de 2015ine de Kooperatîfê Cinîyan ê Xoser ame awankerdiş û îmza eşt xeylêk xebatan. Binê banê kooperatîfî de, sebze ameyî ramitiş, tirşî ameyî viraştiş, werdê herêmî bêrê viraştiş. La 2016ine de tayînkerdişê qeyûman dir kooperatîfî ameyî padayîş.

 

Kooperatîfê Cinîyan ê Evîne di serrî verê bi amancê ganekerdişê wareyê berardişê cinîyan, ame awankerdiş. Îdarekara kooperatîfî Yildiz Çetîn derheqê babete de qisey kerd.

 

‘Krîzê ekonomî tesîrêk pîl serê merdiman de kerdo’

 

Yildiz Çetîn da zanayîş ke şîdetê cinîyan roj bi roje zêde beno û vat: “Welat de qetilkerdişê cinîyan her ke şino zêde beno. Vernîya nê qetilkerdişan nîno padayîş. Nê problemî cidî yê. Peymana Stenbolî di serrî verê ameye betalkerdiş û badê nê zî şîdet zêde bî. Rolê cinîyan yeno dayîş; keye de roniştiş, mutbex de xebate, tutan rê ewnîyayîş û hemverê şîdetî veng nêvetiş o. La ma hemverê nê de têkoşîn kenê. Ma semedê temsîlkarîya têduştî têkoşîn kenê. Krîzê ekonomî tesîrêk pîl merdiman ser o kerdo. Wexto ke keye de werd çinî bo, muxatabê tutan dayîk ê. Sey ke berpirsîyarê pêro probleman cinî yê, hesab cinîyan ra yeno persayîş.”

 

‘Ma 2015ine de Kooperatîfê Cinîyan ê Xoser awan kerd’

 

Yildiz Çetîn bale ant serê muhîmîyê kooperatîfê cinîyan û wina dewam kerd: “Cinî çîyêk nêkerê zî wa kooperatîfan awan bikerê û xebatê xo bikerê. Ma 2015ine de kooperatîfê cinîyan xoser awan kerd. Nê  kooperatîfî de 60 cinî ameyî îstîhdamkerdiş. Xebatê cidî ameyî kerdiş. La qeyûman dir kooperatîfî ameyî padayîş. Cinî mexdûr bîyî. Ma nika Kooperatîfê Cinîyan ê Evîne de xebatan dewam kenê. Yewin amancê ma o yo ke ma cinî destê xo bidê yewbînan û paştdayîş bidê yewbînan. Ma cinî hêzê xo bikerê yew. Ma cinî rolê ke ma rê ameyê ferzkerdiş vejîyê teber.”

 

Ma dest bi viraştişê şêra kerd

 

Yildiz Çetîn wina qedêna: “Kooperatîfê ma zêdeyêr hetê tekstîlî de faliyetan keno. Nika ma şêra viraznenê. Wextê bêro de ma do nano tenik viraznê. La bi giranî cil û belgê kurdî ma derznenê. Semedo ke kulturê ma vînî nêbo, ma şuxilênê.”