AMED- PM'yê DBP'yî netîcenameyê kombîyayîşê xo de, bale ant ser çareserîya meseleya kurdî ya bi rayîrê demokratîke, azadiya fizîkî ya Abdullah Ocalanî, yewîya neteweyî ya kurdan û statuyê kurdan. 

 

Partîya Herêmanê Demokratîke (DBP) badê 7. Kongreya xo ya Asayî, 19’ê çeleyî de kombîyayîşê Meclisê Partîya organîze kerd. PM’yê DBP’yî netîcenameyê kombîyayîşê xo eşkera kerd. 

 

Netîceyê kombîyayişê PM’î yê DBP’yî wina yo:

 

“Ma sey şarê Kurdistan û Rojhelatê Mîyanênî binê sîya şerê dinya yê newî de mîyanê prosesê tarîxî ra derbas benê. Modernîteya kapîtalîste bi taybetî nêmeyê dideyinî yê seserra XX. de raştê krîzanê xorînan amebî. Na rewşa krîzî dormeyo ke tede bêtêduştîyê ekonomîk û komelkî yê globalî zedîyenê, krîzê ekolojîkî kûr benê û ercê demokratîkî werîyenê de her ke şino zelal bena. Baxusus stratejîyê ke çimeyanê enerjî yanê newîyan ser o hîra benê, bi teqayîşê şerêkê pîlî wazenê xo newî bikerê. Rojhelatê Mîyanênî yo ke merkezê şerî yo, semedê newe ra formgirewtişê modernîteya kapîtalîste sey wareyêko krîtîk vejîno vernî. Pêkewtişê pergalê kapîtalîstê ke Rojhelatê Mîyanênî de qewimîyenê, têna pêkewtişê ekonomîk û sîyasî nîyî, ê eynî wext ravurîyayî bi şerêkê îdeolojîkî. Krîzê ke modernîteya kapîtalîste raştê ci yena, seba şaranê Rojhelatê Mîyanênî hem gef hem zî firsendan peyda kenê. Demê nîyanênî de kurdî zî herême de şaranê bînan reyde wareyêkê hemparî de seba pîlkerdişê têkoşînê demokrasî û azadîye wayîrê potansîyel ê.

 

Bingeyê yewîya neteweya kurdan

 

Kurdê ke seba feydedarbîyayîşê nê firsendê tarîxî hêzdar ê, nê prosesî de wayîrê pozîsyonê awankerdişê azadîya xo û azadîya şaranê Rojhelatê Mîyanênî yê. Nê bingeyî de têkoşînê azadî yo ke bi serkêşîya kurdan qewimîyeno, demokratîkbîyayîşê Rojhelatê Mîyanênî rê ber akeno. Bêşik seba resayîşê na netîce, gamanê muhîman ra yew mîyanê kurdan de yewî ya. Ewro Rojhelatê Mîyanênî de hemsencîyê ke bedilîyenê û konjonkturo globalo ke şerê dinya yê newî reyde şekîl gêno, bingeyê yewîya neteweyî de têhetameyîşê kurdan mecburî keno.

 

Çareserîya demokratîke ya semedê meseleya kurdî

 

Babeta bîna ke konjonkturo global ferz keno, persa kurdan rê çareserî ya. Persa kurdana ke bi rejîmê komara ke seserra dideyine derbas kena bi hawayêko sîstematîk nêameye çareserkerdene, sey meseleya mîyanneteweyî mîyanê sebebanê krîzanê Rojhelatê Mîyanênî de cayê xo gêna. 1ê teşrîna verêna 2024î ra pey seba çareserîya na mesele tayê averşîyayîşê girîngî qewimîyayî. Labelê ma zanê ke derheqê meseleya kurdana ke sîyaset ra cor a de bi nameyê çareserîye tayê nîqaşî virazîyenê.

 

Azadîya Birêz Ocalanî

 

Rixmo ke rayapêroyî de derheqê çareserîya demokratîke ya meseleya kurdan û aştîya rûmetine de kelecanêk peyda bî, hedefgirewtişê destkewteyanê Rojawanî, bi polîtîkayanê qayûmî xespkerdişê îradeyî û operasyonê sîyasî hêvîyanê çareserî û aştîye xeripnenê. Coka qedîyayîşê hêriş û konseptê înkarî, wedarîyayîşê tecrîdê vera Birêz Ocalanî û pêvînayîşê ke çareserî armanc kenê ganî bêrê caardene. Êdî wa bêro zanayene ke azadîya Birêz Ocalanî Rojhelatê Mîyanênî de kilîtêkê îklîmê aştî yo. Nê semedî ra ma sey DBP bi qerardarî vanê ke seba çareserîya meseleya kurdan ganî her tewr nîqaş û hewldayîş çarçewaya gamanê şênberan de bi pênaskerdiş bivirazîyê. Bêşik na mana de gama muhîm a ke bêro eştene, azadîya fîzîkî ya Birêz Ocalanî ya.

 

Çike modelê cuya hempare (neteweya demokratîke-konfederalîzmo demokratîk) yo ke bi destê Birêz Ocalanî ame formulekerdene zaf girîng o. No model Kurdistan û Rojhelatê Mîyanênî de seba awankerdişê aştîya mende sey rêber o. Modelê komelî yo demokratîk, ekolojîk, komunal û azadîwazê cinîyan xora nika Rojawan de yeno caardene. Awbendê Tişrînî û pirdê Qereqozaqî de xoverdayîşo ke peyda beno, eslê xo de seba pawitişê modelê Rojawanî qerardarîya şaran ramojneno.

 

Serdemo newe

 

Nê konteksî de ma sey DBP sîyasetê rayîrê 3. esas gênê û bi paradîgmaya demokratîk, ekolojîk û azadîwazê cinîyan têkoşînê xo domnenê. Ma bi metodanê demokratîk û aştîyane seba çareserkerdişê meseleya kurdan awankerdişê şertanê aştî û bi no hawa pîlkerdişê têkoşînê sîyasetê demokratîkî sey mesûldarîya tarîxî hesibnenê. 

 

Semedê pêameyê nê rojan ke semedê ameyoxê ercê demokrasî û azadî yewbînan rê muhîmêr;

 

*Bi metodanê demokratîk û aştîyane çareserkerdişê persa kurdan

 

*Peydakerdişê azadîya fîzîkî ya Birêz Ocalanî

 

*Awankerdişê yewîya kurdan a neteweyî

 

*Sere de Rojawan, pawitişê destkewteyanê şarê kurdî û peydakerdişê statuyê kurdan

 

*Perspektîfê sîyasetê rayîrê 3. de hêzdarkerdişê sîyasetê demokratîkî

 

*Paredaya hempare de bi wayîrvejîyayîşê talebanê demokrasî û azadî yê şaran peynîardişo serkewte

 

*Tepişteyê sîyasî yê ke zîndanan de bi hawayêko bêhuqûqî dîyenê tepiştene rê azadîye

 

*Çîyêko zaf girîng zî bi serkêşîya Têkoşînê Azadî yê Cinîyan awankerdişê komelê azadî.”