Rojda Aydin-Pelşîn Çetînkaya

 

AMED – Endamên meclîsa şaredariyên Bismil û Çinarê, bal kişandin ser xwedîderketina civakî ya ku ji hêla rêveberiyên xwecihî ve tê meşandin û bang li hikûmetê kirin ku ji bo azadiya fîzîkî ya Rêberê Gelê Kurd Abdullah Ocalan, pêşvebirina pêvajoya danûstandinan û xurtkirina modela rêveberiya demokratîk-a herêmî gavên berbiçav bavêje.

 

Bi “Banga Aştî û Civaka Demokratîk” a Rêberê Gelê Kurd Abdullah Ocalan re ku di 27’ê Sibatê de hat kirin, pêvajoya aştiyê ji bo nîqaşê ji nû ve hate vekirin, rol û berpirsiyariyên rêveberiyên xwecihî careke din bûne mijara sereke ya rojevê. Xurtkirina lihevkirina civakî, aktîvkirina mekanîzmayên diyalogê ji asta herêmî dest pê dike û zêdekirina beşdariya demokratîk wekî aliyên girîng ji bo domdariya pêvajoyê derdikevin pêş. Polîtîkayên navendî tenê bi rêya rêvebiriyên xwecihî yên bihêz û jêhatî dikarin bi awayekî bi bandor bên bicihkirin.

 

Bi vê yekê re Konferansa Jinan a Rêvebiriyên Xwecihî ya Amedê di 29’ê Nîsanê de bi dirûşma “Em bi vîna jinan û komûnan, bi rêvebiriyên xwecihî civaka azad ava dikin”, konferansa giştî jî di 30’ê Nîsanê de bi dirûşma “Komun Şaredarî ye, Şaredarî Komun e” hat lidarxistin. Di konferansa du rojan de, bal hat kişandin  ser têgeha komunê û hat diyarkirin ku ew ê sîstemek demokratîk ava bikin. 

 

Ji rêvebiriyên xwecihî ber bi seferberiya gel

 

Endama Meclîsa Şaredariya Bismilê Amîne Kutlay, diyar kir ku xebatên ku bi pêşengiya rêveberiyên herêmî têne kirin, hestek xurt a xwedîderketina civakî diafirîne û got, “Bi rastî, karê ku em di çarçoveya rêveberiyên herêmî de dikin li ser bingehek pir xurt hatiye avakirin. Piştî pêvajoya ku salek û nîv berê dest pê kir, li kolanan, qadan û di hevdîtinên gelan de hestek xwedîderketinê ya girîng derket holê. Ev hesta xwedîderketinê hem di şexsê şaredariyan de û hem jî di nav gel de bi awayekî zelal diyar e. Her çend beşek ku baweriya xwe bi dewletê nayne jî em bi gelek kesên ku baweriya xwe bi serokatiya xwe, hevserok û rêveberiyên herêmî tînin re xebateke berfireh dimeşînin. Em bang dikin ku ev pêvajo bi hev re li kolanan, qadan, civînên giştî û serdanên malan were avakirin. Li gelek bajar û navçeyan eywanên mezin tijî bûne û cih neman. Gel bi girseyek mezin beşdarî van civînan bûn. Di van civînan de li ser xwedîderketina li pêvajoyê û jiyaneke çawa nîqaş hatin kirin. Bi rêya danûstandin û nîqaşên ku pêk hatin, rê û rêbazek nû derket holê. Ev rêbaz nêzîkatiyek demokratîk û kolektîf temsîl dike ku li ser bingeha beşdariya rasterast a gel e.”

 

Girîngiya modela komunal di rêveberiyên herêmî de

 

Amîne Kutlay destnîşan kir ku wan hewldanên ji nû ve avakirinê berfireh kirine û teqez kir ku pêdivî ye perspektîfa Rêberê Gelê Kurd Abdullah Ocalan civakî bibe, azadiya wî ya fîzîkî were misogerkirin û pêvajoya aştiyê were pêşve xistin. Amîne Kutlay bi lêv kir ku Konferansa Rêveberiyên Xwecihî ya di 6-7’ê Hezîranê de dê di vê pêvajoyê de qonaxek girîng be û domand, “Hewldanên me yên ji bo ji nû ve avakirinê îro jî berdewam dikin. Bi rêya xwendin, civînan û amûrên rêxistinî yên cûrbecûr, em hewl didin ku vê pêvajoyê bi awayekî rast û bihêz ji raya giştî re ragihînin. Armanca me ew e ku em zanîna vê pêvajoyê û perspektîfa ku Abdullah Ocalan pêşxistiye civakî bikin. Pêşxistina pêvajoya aştî û danûstandinan di dilê hemû hewldanên me de ye. Li gelek deveran, daxwaza azadiya fizîkî ya Birêz Ocalan êdî bûye daxwazek eşkere. Ew rastîya ku gel bi polîtîkayên zilm û zordariyê nayê birêvebirin, bi tundîtir tê xuyakirin. Di 6-7’ê Hezîranê de konferanseke me ya rêveberiya xwecihî heye. Amadekariyên vê konferansê berdewam in û em ê karê dawî bikin. Konferans dê bibe gaveke girîng di kûrkirina perspektîfa me ya li ser rêveberiyên herêmî de. Bi xebata xwe ya bi dirûşmeya ‘Komun Şaredarî ye, Şaredarî Komun e” em nîqaş dikin ka em çawa dikarin jiyana komunal bi rêya şaredariyan bînin taxan, kolanan û rasterast bikin jiyana mirovan. Ev di heman demê de tê wateya avakirina têgihîştineke demokratîk, beşdar û azadîxwaz a rêveberiya xwecihî.”

 

‘Ev pêvajo ji bo rêvebiriyên xwecihî girîng e’

 

Endama Meclîsa Şaredariya Çinarê Nurşehem Efe jî destnîşan kir ku Rêberê Gelê Kurd Abdullah Ocalan pêvajoyek nû daye destpêkirin û got, “Ji aliyê gelên kurd ve gavên şênber hatin avêtin. Lê belê ji aliyê desthilatdariyê ve hîn jî gavên şênber nehatine avêtin. Em dixwazin ku Birêz Abdullah Ocalan bi awayek fîzîkî di nav me de be. Her wiha em dixwazin ku di qanûnan de jî gûhertin bên kirin. Ev pêvajo ji bo me gelek girîng e. Em naxwazin ku êdî dayik rondikên çavan bibarînin û xwîn birije. Birêz Abdullah Ocalan û hemû girtî divê di nav me de bin. Ji bo ku ev hemû pirsgirêkên civakî çareser bibin pêwîstî bi azadiya fîzîkî ya Rêber Ocalan heye. Desthilatdar bila gavên şênber bavêjin da ku baweriya me bi vê pêvajoyê bê. Ger ku gavên pêwîst bên avêtin, dê di aliyê rêvebiriyên xwecihî de jî pirsgirêk bên çareserkirin. Ji ber vê yekê pêvajoya ku em têde ne ji bo rêvebiriyên xwecihî gelek girîng e.”