NAVENDA NÛÇEYAN - TTJK-E'yê diyar kir ku ew ji ber wefata dayika Sakîne Cansiz, Zeynep Cansiz xemgîn bûne.

 

Dayika yek ji kadroyên damezrîner a PKK’ê Sakîne Cansiz, Zeynep Cansiz îro (13’ê Nîsanê) jiyana xwe ji dest da. Sakîne Cansiz 9’ê Çileya 2013’an li paytexta Fransa Parîsê hate qetilkirin.

 

TJK-E’yê di daxuyaniya nivîskî de got, “Me bi êşeke mezin û xemgîniyeke kûr, zanî ku Dayê Zeynep wefat kir.”

 

Di daxuyaniyê de ev tişt jî hate diyarkirin: “Şahida Komkujiya Dersimê Dayê Zeynep tevî êşên di tevahiya temenê xwe de jî, bi serbilindî li ser piyan maye; ti carî dest ji nasname, ziman û çanda xwe bernedaye û rûmet, sebir û ruhê berxwedanê yê gelê Kurd bi halê herî xurt temsîl kiriye.

 

Bi dilê dayikekê tevî hemû windahiyan, rondikên xwe yên çavan veguherand berxwedanê, êşa xwe veguherand têkoşînê; li dijî zilma li hemberî gelê wê bêdeng nema, bawerî û sekna xwe heya nefesa xwe ya dawî parast.

 

Weke dayika Sakîne Cansiz jî tenê zarokek mezin nekiriye, mîrateyeke berxwedanê mezin kiriye; di şexsê wê de dilsoziya xwe ya ji bo têkoşîna azadî û rûmetê di her şert û mercî de domandiye.

 

Em ê Dayê Zeynep bi berxwedan, zanist, dilê wê û şopên ku hiştiye, bi bîr bînin.

 

Di serî de malbata wê, em ji hemû gelê xwe re sersaxiyê dixwazin.”