NAVENDA NÛÇEYAN - Wênesaz û hunermenda navdar Jîla Hedayî li Tehranê koça dawî kir. Jîla Hedayî bi berhemên xwe yên di warê wênesaziya zarokan û çalakiyên navneteweyî de dihate naskirin.

 

Wênesaz û hunermenda di warê hunerên dîtbarî de Jîla Hedayî, îro li Tehranê koça dawî kir. Hunermend û wênesaz Jîla bi salan di warê wênesaziyê de çalak bû. Berhemên wê ku teknîkên wekî wênesazî û kolajê li hev dicivandin, şêwazek dîtbarî ya bêhempa afirandibûn.

 

Jin û keç, bîranînên zaroktiyê, xewn, xeyal û lêgerîna nasnameyê mijarên sereke di berhemên Jîla Hedayî de bûn. Bikaranîna paşxaneyên tarî, rûyên sade û sembolîk û tevlîhevkirina hêmanên wênesaziyê bi kolajê re, taybetmendiyên karakterîstîk ên berhemên wê bûn.

 

Jîla Hedayî di wênesaziya pirtûkên zarokan de jî pir çalak bû û bi Weşanxaneya Şabavîz re hevkarî kir. Di sala 2014’an de, ew yek ji sê wênesazên îranî bû ku berhemên wan di Pêşangeha Wênesaziyê ya Bologna li Îtalyayê de hatibûn pejirandin; di wê merasîmê de 75 wênesaz ji zêdetirî sê hezar beşdaran hatibûn hilbijartin.

 

Wê her wiha di 50’emîn Bîenalxaneya Navneteweyî ya “Pênûsa Zêrîn a Belgradê” de ku di sala 2019’an de hat lidarxistin, di nav wênesazên Îranî yên ku ji bo vê çalakiyê hatibûn hilbijêrin de cih girt.

 

Yek ji berhemên Jîla Hedayî yên ku ji bo Taywanê hatibû şandin, çîroka keçeke biçûk vedigot ku stargeh di cîhana xeyalan de dîtibû; berhemek ku di blogeke hunerî ya Taywanî de jî wekî mînakeke wênesaziya afirîner hatibû naskirin.

 

Beşdarbûna pêşangeh û bûyerên navneteweyî yên wênesaziyê, di nav de Pêşangeh û Bîenala Bologna, beşek ji serpêhatiya hunerî ya Jîla Hedayî bû. Hunermendek ku bi zimanê wêneyan, vegotinên li ser jinan, zarokatî û cîhana xeyalan gihandibû xwendevanên xwe.