MERKEZÊ XEBERAN - Înîsîyatîfê Yewîya Demokratîk, hêrîşê Komara Îslamî ya Îranî ser Rojhêlat û Başûrê Kurdîstanî bi şîdet şermezar kerd û vat ke, vera nê sîyasetê qirkerdiş û dardekerdişî, xopawitişo tewr tesîrdar yewîya neteweyî ya.

 

Înîsîyatîfê Yewîya Demokratîk bi eşkerayîyêk bale ante serê sîyasetê teda, girewtene, dardekerdiş û hêrişê Komara Îslamî ya Îranî yê vera şarê kurdî. Eşkerayî de ame dîyarkerdene ke Îran her wext neyarîya xo vera kurdan dewam kerda û mîyanê 5 aşmanê peyênan de nêzdîyê hezar drone û fuzeyan hêrişê serê Başûrê Kurdîstanî kerd. Sewbîna ame dîyar kerdene ke hêrişê peyên de yê ke serê kampê Komeleya Şorişgêr ya Zehmetkêşanê Kurdîstanî yê Îranî de 9 pêşmergeyî şehîd bîyî û vera nê tehlukeyî yewîya neteweyî seba  her 6 partîyanê kurdan yê Rojhelatî zaf muhîm o.

 

Eşkerayîya Înîsîyatîfê Yewîya Demokratîk wina ya:

 

“Komara Îslamî ya Îranî bi desan serran  o Rojhelatê Kurdîstanî de polîkaya girewtiş û dardekerdişî rayra bena. Teda û zorê serê şarê kurdî yê Îranî konjonkturel û tena bi rejîmî ra girêdaye nîyê. Coka wextê şahî de zî wextê melayan de zî hêrişê hovane her tim dewam kerdê. Heta ke dewleta Îranî nê rojanê ke hêrişê Amerîka û Îsraîlî dewam kenê zî neyarîya şarê kurdî veranêdano.

 

Destpêekê şerê Îran û DYA/Îsraîlî heta ewro, bi desan girewteyê sîyasî dardekerdî û  tehlukeyê serê Rojhelatê Kurdîstanî roj bi roj zêde beno. Sewbîna dewleta Îranî wazena aramîya Başûrê Kurdîstanî zî çin bikero. Bi nê amancî mîyanê 5 aşmanê peyênan de nêzdîyê hezar drone û fuzeyan hêrişê Başûrê Kurdîstan kerd. Bi desan kesî ameyî qetilkerdene. Tena mîyanê çend rojanê peyênan de Silêmanî û Hewlêr reyna bîye hedefê hêrişê giranan yê Îranî ke vera kampê partîyanê kurdî yê Rojhelatê  Kurdîstanî.

 

Dewleta Îranî bi fuzeyan eşt serê kampê Komeleya Şorişgêran ya Zehmetkêşanê Kurdîstanî yê Îranî. Netîceyê nê hêrîşan de 9 pêşmergeyê Komela şehîd bî. Her çiqas helwestê partîyê Kurdî yê Îranî derheqê şerê Îran û DYA/Îsraîlî de zelal bo zî, motîvasyona neyarîya dewleta Îranî vera Kurdan bi hawayêko xurt dewam keno.

 

No sebeb ra prosesê şerî de zî tu wext dest hêrişanê serê şarî kurdî ra veranêdano. Goreyê tayê îdiayan, dewleta Îranî seba hêrişêko gird çekanê girdan neqlê Rojhelatê Kurdîstanî keno.

 

Nê prosesê tehlukeyî de bêguman pawitişo tewr tesîrdar yewîya neteweyî ya kurdan a. Naye ra yewîya 6 partîyanê kurdan ê Rojhelatî hem ewleyîya  şarî temîn keno hem zî hêvîya azadîye girdêr keno. Ma sey kurdê Vakurê Kurdîstanî bi yewîya ke Rojhelat de pê ameya zaf kêfweş ê û qerarê têkoşînê hempar e sereberz ê.

 

Hêvîya ma aye ke bi yewîya demokratîk; yew helwêst, yew fikir û yew vate bêro awankerdene ke dinya bizan o şarê kurdî û kurdîstanî çi wazeno. Ma çarçewaya yewîya neteweyî de paştîdayena xo bi way û birayanê xo yê Rojhelat û Başûrî reyde pare kenê . Ma hêrişanê dewleta Îranî yê serê erdê Kurdîstanî bi şîdet şermezar kenê û serweşîye seba keyeyê 9 şehîdanê Kurdîstanî û Komeleya Şorişgêrî ya Zehmetkeşanê Kurdîstanê îranî wazenê.”