ŞIRNEX - Dimayê "Venga Aştî û Cimatê Demokratîkî", paweyê pênasekerdişê hucreyêkê huquqî yê. Cinîyê Botanî dîyar kerdê ke ganî lezkî sererastkerdişê qanûnî bêro kerdene.

 

Dayîka Aştîye Mevlude Gunden da zanayene ke ê aştîye wazenê û wina vat: “Semedê ke proses serkewte bo çi destê me ra bêro ma kenê. Ganî êdî dewlete game bierza. Ma aştî, aramî û yewbîyayîşî wazenê. Ganî heme dayîkî destê xo bidê yewbînan. Wa pîya aştîye bîyarê. Wa gonî nêrêjîyo. Kezeba me veşaye, wa yê dayîkanê bînan nêveşa. Wa heme dayîkî aştîye biwazê.”

 

Ganî hucreyêko huquqî bêro amadekerdene

 

Mevlude Gunden dîyar kerd ke ganî çarçewa prosesî de hucreyêko huquqî bêro amadekerdene û wina dewam kerd: “Ganî tepişteyî azad bibê. Birêz Abdullah Ocalan 27 serrî yo semedê aştîye xebitîyeno. Ganî sererastkerdişî bêrê kerdene. Ma semedê aştîye çi destê me ra bêro kenê. Çimê ma zî qanûnan ser o yo. Heta qanûnî nêvejîyê bawerîya me zî çin a.”

 

Îdarekara DEM Partî ya Cizîrî Bediye Înedî zî dîyar kerd ke proses bi venga Rayberê Şarê Kurdî Abdullah Ocalanî dest pêkerdo û wina dewam kerd: “PKKyî çekî veşnayî. Wa êdî dewlete game bierza. Wa tepişteyî bêrê veradayene. Wa her kes erdê xo ser o azad bo. Ma erdê xo ser o çim veranêda malê tu kesî. Wa ma mîyanê aramîye de bîciwîyê. Ma mektebanê xo wazenê. Ma wazenê bi ziwanê xo bîciwîyê.” Bal ant serê qanûnê mende yo ke paweyê ci yê û wina dewam kerd: “Dewlete hema tu game nêeşta. Ganî tepişteyî bêrê veradayene. Ganî gerîlayî biagêrê. Ma semedê her kesî aramîye wazenê.”

 

‘Hema zî qanûnî nêameyê vetene’

 

Dayîka Aştîye Hatîce Beytur zî dîyar kerd ke roja proses dest pêkerdo PKKyî zaf gamî eştê û nê erjnayîşî kerd: “Dewlete hema game nêeşta. Qanûnî nêvejîyayî werte. Tutê me hema tepişte yê. Semedê azadîya înan ganî qanûnî bêrê vetene. Dewlete çira game nêerzena? Gelo wazenê me bixapênê? Êdî tu kes nêşêno şarê kurdî bixapêno. Ma semedê aştîye amade yê. Çi bikewo serê milê me ma do bikerê. Ma tu kesî ra nêtersenê. Semedê gerîlayî biagêrê hema zî qanûnî nêameyê vetene.”