AMED - Meclîsê Cinîyan ê Şaredarîya Peyasî ke tewr peyên îdarekarîya xo newe kerdbî, roniştişê xo yê yewine ê hîra Keyeyê Kerpîçî yo ke Parka 75ine de yo, organîze kerd.

 

Roniştiş de Hemşaredara Peyasî Bêrîvan Gulşen Sîncar, endamê meclîsê şaredarîye, hetkarê hemşaredaran û endamê Meclîsê Cinîyan bi tewirêko aktîf amade bîyî.

 

Roniştiş de seba pîlkerdişê fehmê îdareyanê herêmîyan û awankerdişê sîstemêk wina ke cinîyî biancê heme cayanê cuye de bi tewirêko têduşt, azad û aktîf ca bigirê, erjnayîşî ameyî kerdiş. O wext bal ameye antiş serê fîrazîya xurtkerdişê yewbîyayîş û rêxistinbîyayîşê cinîyan ê mîyanê qezayî de.

 

‘Qisey, kede û îradeyê cinîye do dîyarker bê’

 

Endamê Meclîsê Cinîyan ê Şaredarîya Peyasî dîyar kerdî ke ê seba awankerdişê cuyêka demokratîk, ekolojîk û azadîwaz ke qisey, kede û îradeyê cinîyan tede dîyar bo, têkoşînê xo her şert û mercî de û bi heme tewiran do rayra berê. Tewrbîyoxan bi qerardarî vernî de geyrayî ke xebatê înan ê seba pawitiş û averberdişê heqanê cinîyan do bêmabêne û bi coşêko pîl dewam bikerê.