Pelşin Çetinkaya

 

ÊLIH - Belgeyanê neweyan ê ke derheqê tehqîqatê Merkezê Ewnîyayîşî yê Şîfayê Taybetî yê Êlihî de ameyî destvistiş de ame dîyarkerdiş ke 50 kesî nê tesîsî de manenê. Goreyê qeydan, na kome 29 nêweşanê mêrdan û 21 nêweşanê cinîyan ra pê yena.

 

Nêzdîyê 20 rojan verê cû, çarçewaya tehqîqatê serê îddîayanê tecawûz, îşkence, mergê bi guman û zafê bêusulî de Merkezê Ewnîyayîşî yê Şîfayê Taybetî yê Êlihî ke nêzdîyê dewa Krêdîyî yo û xizmet dano nêweş, astengdar û kal û pîran, bi îddîayê tecawûz û zafê bêusulîyê bînan operasyonêko hîra ame kerdene. Tehqîqatê ke ame kerdene de 80 ra zêdeyî kesî ameyî destbendkerdiş û 10 ra zêdeyê kesî zî ameyî tepiştiş.

 

Dîmen, belge

 

Raporê ke 27 û 28ê hezîrane de ameyî weşanayîş de, dîmenê ke îşkenceyê serê merdiman ê mîyanê merkezê ewnîyayîşî de mojnênê ameyî destvistiş; belgeyê fermî, nameyê zereyî û eşkerayîyê ke dosyaya tehqîqatî ra pênase bîyî raya pêroyî dir ameyî parekerdiş.

 

‘Îşkencekerdişê nêweşan ame protestokerdiş’

 

Dimayê eşkerakerdişê hedîse seba raya pêroyî, zafê merdiman; bi taybetî roniştoxê Êlihî vera îşkenceyê mîyanê merkezê ewnîyayîşî û prosesê hukmî yê ke dewam keno de nêrazîbîyayîş mojnayî. Cinîyî zî amadekarî kenê ke Êlih de çalakîyanê tewir bi tewir organîze bikerê û derheqê na babete de edalet biwazê.

 

‘50 kesî nê merkezî de bî’

 

Goreyê agahîyanê neweyan ê ke ameyî destvistiş, pêroyî de 50 kesî merkezê ewnîyayîşî de est bî ke mîyanê înan de 29 nêweşê mêrde û 21 nêweşê cinî bî. Ame neqlkerdiş ke mîyanê nêweşan de kesê pîr û kalî zî est bî.