ÊLIH - Cinîyanê TJAyî hemverê hedîsaya ke Merkezê Rehabîlîtasyonê Taybetî yê Şifa yê Êlihî de ameye ciwîyayîş nobete dest pêkerdî, dîyar kerdî ke çîyê ke ameyê ciwîyayîş bêmerdimî yê û reaksîyon vera rewşe mojnayî. Cinîyan vatî ke do hemverê nê de bêveng nêmanê.

 

Têgêrayîşê Cinîyanê Azadan (TJA) hemverê îdîayê hedîsanê îşkence, tacîz, tecawiz û îdîayê merdişanê bigumana ê ke Merkezê Rehabîlîtasyonê Taybetî yê Şifa yê Êlihî de kewtî rojeve, vernîya edlîye de çalakîya roniştişî dayî destpêkerdiş. Rêxistina Partîya Têduştî û Demokrasî yê Şaran (DEM Partî) û çalakîkerê TJAyî yê Mêrdînî semedê piştîdayîşî ameyî Êlihî. Sewbîna Dayîkanê Aştîye zî piştîdayîşê çalakîye kenê.

 

Cinîyê ke tewrê çalakîye bîyî hemverê hedîseya ke Merkezê Şifa yê Êlihî de ameya ciwîyayîş ajansê ma rê qisey kerdî.

 

‘Ma do bêveng nêmanê’

 

Meclîsê Cinîyanê DEM Partîye ya Mêrdînî Emîne Çîftçî va ke çîyê ke gumanbaran kerdî do înan rê nêmano û va: “Ma Mêrdînî ra tewrê çalakîye benê. Ma na hedîse şermezar kenê. Heta nika çîyê ke ma eşnawitî bêmerdimîye yê. Bi çend rojî yo zerreyê ma veşeno. Lazim o ke ma nê ser o vinderê. Yê nê bêmerdimayî kerdî lazim o ke bêrê cezakerdiş. Ma wina tersenê ke nêwazenê tutanê xo vejê teber. Semedê çi kenê, semedo ke înan rê maneno. Edalet pê nêro do nê bêmerdimayî zî bidomîyê. Ma êdî nêeşkenê bi roje bivejê teber. Wa dewlete nê gumanbaran ceza bikero ke êdî wina çîyêk nêro ciwîyayîş. Ma do hemverê nê bêveng nêmanê.”

 

‘Heta demokrasî çinbo do nê hedîseyî bêrê ciwîyayîş’

Çalakîkera TJAyî Gulîstan Oncu va ke sucdarî dewlete ra hêz gênê û wina qisey kerd: “Ma Mêrdînî ra ameyî tîya. Na hedîse şermêk pîl a. Na hedîse ne verêne ya, ne zî do ya peyêne bibo. Lazim o ke her kes bizano ke heta demokrasî çinbo do nê hedîseyî bidomîyê. Nê hedîseyî bi destê sîstemî pê yenê. Welat de demokrasî çinbo do hedîseyî bidomîyê. Gumanbarî dewlete ra hêz gênê. Gumanbarî bêceza yenê verdayîş.”

 

Gulîstan Oncu peynîya qiseykerdişê xo de va ke do hemverê tu hedîse bêveng nêmanê û wina qedêna: “Roje de 5-6 cinî yenê qetilkerdiş. Hedîseya ke Êlih de ameye ciwîyayîş normal nîya. Hedîseyê wina cayê kurdan de zêde yenê ciwîyayîş. No tesaduf nîyo. Kurdî bi serran têkoşîn kenê. Nê semedî ra nê hedîseyê wina bi zaneyîş yenê domnayîş. Rojîn Kabaîş, Rojwelat Kizmaz, Gulistan Doku… Lazim o ke ma hemverê nê sîstemî de têkoşîn bikerê.”