MERKEZÊ XEBERAN - Zarok Ma Belçîka de tutan dir kom bi. Çalakîye de, bale dîya muhîmîyê neqlkerdişê ziwan û kulturê kurdî semedê neslê neweyî yê ke dîasporayî de yê.

 

Zarok Ma semedê xurtkerdişê têkilîyê tutanê kurdî yê ke Ewropayî de yê ziwan û kulturê kurdî dir, bajarê Aalstî ya Belçîkayî de çalakî organîze kerd. Tutî deyîranê kurdî vatî û hetê temaşekerdoxan ra bi eleqe û kêfweşî ameyî pêşwazîkerdiş. Zarok Ma ke zaf bajarê Ewropayî de semedê xurtkerdişê eleqeyê tutan ê kulturê kurdî dir na rey bajarê Aalstî de çalakî organîze kerd. Dimayê atolye, çalakîya ke ameye organîzekerdiş de tutî sehne ser o deyîranê kurdî vatî. Çalakîya ke Belçîka de ameye organîzekerdiş û zafê keyeyê ke bajarê bînan ra tewrê ci bîyî de, qiseykerdişê destpêkî rojnameger Aslan Aslan kerd. Aslan bale ant muhîmîyê pawitişê ziwan, kultur û hunerî hetê tutanê kurdî yê ke surgunî de yê û sipasîya kedkaran kerd

 

Çalakîye de tutî deyîra “Kurdistan çi xweş e” vatî. Temaşekerdoxan bi eleqe performansê tutan temaşe kerd û çepik dayî piro. Keyeyî zî tutan dir vatî û demê hîsgêrî virazîyayî. Peynîya programî de mamoste Şêrko Kanîwar qisey kerd û dîyar kerd ke tutî kam cayî de biciwîyê, ganî xo aîdê welat û warê xo bivînê û neqlkerdişê ziwan, kulturî semedê neslê bînan berpirsîyarîyê ma hemine yo.