AMED - Mudirîya Xizmetanê Ciwanan û Sporî ya Şaredarîya Peyasî, semedê tutanê 7-14 serrî û cinîyan kursanê asnaweyî yê belaş organîze kerd. Kursanê ke emser zî bi waştişêk pîl ameyî pêşwazîkerdiş, hewzanê asnawe yê Enzele, Kupelî, Dîcle û Firatî de yenê dayîş.

 

Goreyê eşkerayîya Mudirîya Xizmetanê Ciwanan û Sporî, bi hezaran kesî muracat kerdî û hûmara muracatan resa 3 hezarî. Semedê nê waştişê zêde, kursî do 6 rojê hewteyî bi hawayê grub bi grub bêrê organîzekerdiş.

 

Eşkerayîye de neql bî ke armancê înan no yo ke sporî sey îmtîyazêk nîyo, la sey heqêk ke her kesî rê resayîş û têduştî bêro dîyayîş. Dîyar bî ke nê xizmetî piştîdayîşê averşîyayîşê asayîş û saxlem ê tutan kenê û beşdarîya cinîyan cuya komelî û sporî de xurt kenê.

 

Kursanê asnawe yê bingehênî, binê çimdarîya pisporanê bi tecrube de, her roje semedê grubê ke ameyî dîyarkerdiş yenê dayîş. Tutê mabêne 7 û 14 serrî û cinîyê ke eşkenê bi hawayêk belaş tewrê nê perwerdeyê asnawe bivînê. Şaredarîya Peyasî bi na xebata xo, ancî qetî kerd ke xizmetê sporî yê pêroyî semedê heme beşanê cimatî domnenê.