ANQARA- Înîsîyatîfê Yewîya Demokratîke derheqê polîtîkayanê dardekerdişî yê Rejîmê Îranî de eşkerayîyêk daye û vat: “Heta rejîmo zordar nêrijîyo do rîsk û tehlukeyî dewam bikerî. Xurtkerdişê xeta hîrêyine berê azadîye akeno. No zî yewîya neteweyî û paştîdayîşêko Kurdîstanî reyde girêdaye yo.”

 

Înîsîyatîfê Yewîya Demokratîke, derheqê polîtîkayanê dardekerdiş, kiştiş û binpaykerdişê heqanê merdiman ke rejîmê Îranî serê şaranê Îranî û Rojhelatê Kurdîstanî de rayra beno, eşkerayîyêka nuştekî pare kerd.

 

Eşkerayî de ame vîrardene ke Rejîmê Îranî xeylê teda û zordarîye serê şarê kurdî yê li Rojhelatê Kurdîstanî de rayra beno û nê çîyî ameyî vatene: “Çi rejîmê şah û meleyan, çi zî rejîmê verê nê her di rejîman, demo ke babete bena kurdî, têgêrayîş û fîkrê înan zî sey yewbînan benê. Bi taybetî, nê rojanê adirbestî yê Îran û DYA-Îsraîlî de yeno vînayene ke polîtîkayanê qelskerdiş, destsernayîş û dardekerdişî ameyê lezkerdene. Rejîmê Îranî de vera şerê DYA-Îsraîlî hêzê leşkerî her ke şino hîna zêde xurt beno. Nê hêzê leşkerî na rewşe seba xo sey firsendêk vînenê û vera hêzanê demokratîkan şuxulnenê. Tena Rojhelatê Kurdîstanî de mîyanê hewtêyêk de 2 ciwanê kurdî bê pers û cipersayîşî ameyî qetîlkerdene, 5 kesî ameyî dardekerdene û rîskê dardekerdişî seba 6 girewteyanê sîyasîyan dewam keno.”

 

Eşkerayî de Înîsîyatîfî da zanayene ke îqtîdarî zilmkarî wayîrê vîrêkê yê û wina dewam kerd: “Zêdebîyayîş û lezbîyayîşê nê dardekerdişan ke sergêra înfazkerdişê 59 kurdanê Mehabadî ya 43. de qewimîyenê, sey tesadûfêk nêyênê vînayene. Şar zî wayîrê vîrî yo û nêwazeno reyna nê kerdişî bêrê serê înan. Heta rejîmê zordarî nêrijîyê yan zî xo nevurnê, do serê Rojhelatê Kurdîstanî de her tim rîsk zî dewam bikero. Ma zanê ke tena xurtkerdişê xeta hîrêyine do berê azadîye seba pêro şaranê Kurdîstanî abiko. No zî ancax bi yewîya neteweyî û paştîdayîşêko Kurdîstanî mumkin beno.”

 

Înîsîyatîfî eşkerayîya xo de dîyar kerd ke zîndananê Îran û Rojhelatê Kurdîstanî de girewteyê sîyasî xover danê û nê çîyî vatî: “Vera cezayanê dardekerdişî, 56 hepisxaneyanê Rojhelatê Kurdîstanî û Îranî de revê veşanîye dewam keno. Goreyê raporanê rêxistinanê heqanê merdiman yê Îranî, mîyanê serra 2025î de 2 hezarî ra zêdeyêr merdimî, mîyanê 5 aşmanê peyênan de zî 43 girewteyê sîyasî ameyî dardekerdiş. Seba ney, kampanyaya ‘Roja Sêşeme Dardkerdişan rê Nê’ 123 hewte yo ke yena rayraberdene. Dayîkê Aşatî yên Rojhelatê Kurdîstanî zî veng da way û birayanê xo û sazgehanê mîyanneteweyî ke vernîya dardekerdişan bêra gîrewtiş.”

 

Peynîya eşkerayî de Înîsîyatîfî waşt ke Neteweyê Yewbîyayeyî (NY) û Parlamentoyê Ewropa tewrê xo yê vera cezayanê dardekerdişî zelal bikerî û wina ame vatene: “Ma veng danaê welatanê ke kurdî tede cîwîyenê ke polîtîkayanê xo yê Îranî bingeyê dişmentîya vera kurdan ser o awan nêkerî. Seba ney, ma veng danê şarê xo yê wayîrê rûmet ke vera Rojhelatê Kurdîstanî bêxem nêbî. Bêrê ma pîya ewro medyaya dîjîtale ser o bîbî vengê way û birayanê xo û pîya çalakîya hastagî ya ‘#NaJiDarvekirinanRe’ hîna pîl bikerê.”