Neslîhan Kardaş

 

ŞIRNEX - Şayîya Adaroke ya ke bi seserran o dewa Melê de pîroz bena, sey nimûneyêka cuye komunale ewro zî yena ciwîyayene. No adet, dewa Melê de her serre yeno pîrozkerdiş.

 

Adarok adetêko 350 serran o ke bajarokê dewa Melê yê Şirnexî de yo. Ameyîşê wisarî reyde bi şayîyan yeno pîrozkerdiş. Bernameyo ke mîyanê xozayî de pê yeno, beroşanê pîlan de bi hawayêko komunal werdî yenê viraştiş. Kayê adetî yenê kaykerdene, govendî yenê kaykerdiş û deyîrî yenê vatene.

 

Cinîyê ke tewrê şayîya Adaroke benê, derheqê nê adetî de qisey kerdî.

 

Bernameyêko sey nimûneyê cuya komunale

 

Hemşaredara dewa Melê Gulsum Akake wina va: "No adet bi serran o dewam keno. Pî û kalanê ma ra yeno. Seba nê ganî nêro vîrakerdene. Ganî ma kulturê xo gane verdê. Verê cû dewan de ameyêne kerdene. Verê cû tenê camêrdî tewr bîyêne. Hawayê normal de aşma adare de ameyîne kerdene. Labelê seba varanî ma nika kenê. Serranê peyênan de cinîyî zî tewr benê. Ma mîyanê xozayî de, wareyê dewe de yenê têhet. Beroşan de werdî viraznenê. Na nimûneyêka cuye komunale ya."

 

‘Ma pîya rojêke xo vîyarnenê’

 

Vecîha Fîdane zî va Adaroke her serre yena pîrozkerdiş û wina dewam kerd: "Werdî yenê viraştiş, tutî kayan kay kenê. Ma tewr benê. Her kes keyeyê xo reyde tewr beno. Ma werdan viraznenê."

 

Hacer Fîdane zî dîyar kerd ke şayîya Adaroke seba înan ameyîşê wisarî temsîl kena û va: "Na şayî dapîr û bapîranê ma ra menda. Verê cû na şayî dewe de ameyîne kerdene, labelê nika seba qerebalîxî xozayî de yena kerdene. Cinî û camêrdî tewr benê. Werdî yenê viraştiş. Dengbêjî deyîran vanê. Govende yena kaykerdiş. Ganî no adet vîndî nêbo, neslê dimayê ma zî nê pîrozkerdişî bidomnê.”