Devrîm Findik

 

STENBOL - Rêxistinê cinîyan û çalakîkeran dîyar kerdî ke binê şerî, feqîrî û binpaykerdişan de kewenê 1ê Gulane û veng dayî cinîyan ke 1ê gulane de meydanan de bê. Cinîyan dîyar kerdî ke têkoşînê cinîyan têkoşînê sinife ra xoser nîyo û vatî ke do sere de Taksîm de û her cayî de vengê xo berz bikerê.

 

Stenbol de rêxistinê cinîyan û çalakîkeran ver bi 1ê Gulane veng dayî cinîyanê kedkar ke meydanan de cayê xo bigîrê. Cinîyan dîyar kerdî ke keda cinîyan nîna dîyayîş, şîdet û feqîrî her şino giranêr beno û vatî ke 1ê Gulane roja pîlkerdişê têkoşînê hembeşî yê karker û kedkaran a.

 

‘Ma 1ê Gulane Taksîm de bê’

 

Yenî Demokratîk Kadinî ra Sevîl Dogan va ke roja 1ê Gulane roja paştîdayîşê karkeran û kedkaran a û wina va: “Na roje de heme sinifê bindestê dinya kewenê kuçeyan. Sey Clara Zetkîn zî vat; xelasîya cinîyan xelasîya sinifa karkeran ra xoser nîya. Nê semedî ra wina rojêk de ganî cinî meydanan de cayê xo bigîrê û cephe de bê. Keda cinîyan yena binpaykerdiş û bêasayîş û şîdet zî pîl beno. Çareserîya nê pîlkerdişê têkoşînê sinife ya. Ma veng danê heme cinîyanê kedkar û karkeran. Hemverê binpaykerdiş, şîdetê mêrdan, qetilkerdiş, hêrişan de ma 1ê Gulane Taksîm de bêrê têhet û vengê xo yew bikerê. Biciwîyo 1ê Gulane! Biciwîyo têkoşînê sinifan.”

 

‘Ma do 1ê Gulane Taksîm de bê’

 

Çalakîkera Têgêrayîşê Cinîyanê Sosyalîstan (SKH) Perîhan Ozgul zî va ke ê binê verasîya şerî û talanî de kewenê 1ê Gulane û va ke do 1ê gulane Taksîm de bê. Perîhan Ozgul wina dewam kerd: “Şertanê cuye de ma qalê meaşê asgarî kenê, esas de ma qalê sîstemêk kenê ke ma qij keno. Meaşê teqawîtbîyayîşî 20 hezar o. Ê ma qij kenê. Sîstemêk ke ma merdim nêhesibneno est o. Ma sey sinifa karkeran do 1ê Gulane Taksîm de bê.”

 

‘Ma heme cinîyan dawet kenê meydanê 1ê Gulane’

 

Çalakîkera Têgêrayîşê Cinîyanê Azadan (TJA) Sebahat Karul zî wina va: “Ma sey cinîyanê TJAyî do meydanan de bê. Ma do her cayî de karkeran û kedkaran dir vengê xo berz bikerê. Semedê ke ma hêzê cinîyan bimojnê ma do 1ê gulane meydanan de bê û ma heme cinîyan dawet kenê meydanan.”

 

Endama Meclîsê Temsîlkarîya Komeleya Paştîdayîşê Morî ya Stenbolî Yildiz Gezîcî zî wina va: “Cinî feqîrîyêk pîl de yê. Çarçeweya 1ê Gulane de ma taxan de keda mîyanê atolye organîze kerd. Ma heme cinîyan dawet kenê meydanê 1ê Gulane.”