WAN - Aktîvîsta TJA’yî ke xebatê 8ê Adare domnenê dîyar kerdî ke do waştişê aştî û azadîye wareyan bîyarê têhet û va: “Aştî do bi destê cinîyan bêro awankerdiş. Ma do kîşte serekîya xo bibê. Ma 8ê Adare de wayîrê prosesê aştîye yê serekîye vejênê. Bawerîya ma bi serekê ma bêpeynî ya.”

 

Têgêrayîşê Cinîyanê Azadan (TJA), bi sloganê “Ma bi xoverdayîş azad benê cimatê demokratîkî mûnenê” destpêkê 8ê Adare da. Çarçeweya xebatan de Wan de xebatî dewam kenê, pêvînayîşê cinîyan, atolye yenê caardiş û cinî yenê goşdarîkerdiş.

Aktîvîstê TJA’yî Nazîme Arvas û Sevgî Erarslan ke xebatan domnenê derheqê babete de qisey kerdî.

 

‘Cinî sey kes nêyenê nasnayîş’

 

Nazîme Arvas da zanayîş ke têkoşînê cinîyan bi serran o dewam keno û semedê bîyayîşê cinîyan bêro nasnayîş têkoşîn kenê. Nazîme Arvas wina ard ziwan: “Cinî bi seserran o sey şexs nêyenê nasnayîş. Cuyayîşê xo wina îdare kenê. Semedê cinî xo nas bikerê, ma çarçeweya 8ê Adare de sey TJA’yî xebatan domnenê. Qeza, dewe, taxan ma xebatê cinîyan domnenê. Ma her cayî de kombîyayîş kenê. Xebatanê ma domnenê de ma vînenê ke cinî azadîye esas gênê.”

 

‘Çimeyê îlhamê ma Rayber Abdullah Ocalan o’

 

Nazîme Arvas wina dergî da: “Ma kombîyayîş de têkoşînê cinîyan, kede, reng, azadîya cinî û Rayber Abdullah Ocalanî qisey kenê. Serekê ma çimeyê îlhamê ma yo. Cinîyê kurdî heme cayî de bedelê pîlan dayê. Nê semedî ra wazenê tewrê têkoşînî bibê. Ganî ma cinî bibê yew. Cinî azad bo cimat zî azad beno. Ma do 8ê Adare de bêrê têhet. Ma venga heme cinîyan danê ke aştîye ra serkêşî kenê. Ma do 8ê Adare de wayîrê prosesê Aştî û Cimatê Demokratîkî vejîyê.”

 

‘Ganî ma bi rêxistine xo xurt bikerê’

 

Aktîvîsta TJA’yî Sevgî Erarslan zî qisey kerd û va 8ê Adare roja têkoşînê heq, têduştî û azadî yo û wina va: “8ê Adare semedê ma tenya roja pîrozkerdişî nîyo. Roja vîrardişî yo. Ma cinî têkoşîn kenê. Cinî heme cayî de çi heyf bi ters têgêrenê. Ganî ma nê tersî xo ser o bierzê. Yan zî ma do azad nêbê. Ganî ma yewbînan ra piştîdayîş bigirê, xo bi rêxistinbîyayîşî xurt bikerê. 8ê Adare roja serewedaritişî ya. Cinî roj bi roje xo rêxistin kenê û têkoşîn kenê. 8ê Adare cinîyan dir ruhê xoverdayîşî gane kerd. Ma wazenê cinîyan bi ruhê azadîye wareyê 8ê Adare de bivînê.”