ANQARA - Cinîyê kurdî yê ke beşdarê mîtîngê Anqara bî, xoverdayîşê Helebî silam kerdî û piştîdayîşê xo şarî û cinîyan rê neql kerdî.

 

Anqara de "Mitîngê Pîlî yê Cinîyan semedê Heq, Cuye û Azadîya Ma" organîze bi ke hetê 37 rêxistinê cinîyan ra pîya yeno kerdiş.

 

Cinîyê ke Kurdistan û xeylêk bajaranê Tirkîya de serê sibayî resayî Anqara verê Îstasyonê Metroyî yî AKM'yî de kom bî.

 

Bi hezaran cinî ver bi Meydanê Tandogan de rayîr ra şîyî ke mîtîngê yeno kerdiş.

 

Çalakîkerê Têgêrayîşê Cinîyanê Azadan (TJA) û Dayîkê Aştîye ke cayê xo rayîrşîyayîşê mitîngî de girewtî, bale antî hêrişê taxanê Şêxmeqsûd û Eşrefîye yê Helebî ser û dîyar kerdî ke ê xoverdayîşî silam kenê û kîşte şar û cinîyan de vindenê.

 

Cinîyê kurdî qetî kerdî ke ê meydanan de her wext waştişê aştîye kenê.