Dîlan Babat 

 

MERKEZÊ XEBERAN - Rojnamegare Berîvan Şaho da zanayîş ke rejîmê Îslamî yê Îranî tena hetê ekonomî de nê, warê asayîş û edaletê cimatî de zî rijnayîşê girdî viraşt û va, vurnayîş ferz o.

 

Îran û Rojhelat de serranê peyênan de çalakî ameyî kerdiş, tena derheqê krîzê ekonomî de nê, sey îfadekerdişê îtîrazî hemverê bêedaletî, zext û desteserkerdişê azadîyan şekil beno. Bi taybetî hêrso ke bi xoverdayîşê ‘Jin Jiyan Azadî’ yê bi serkêşîya cinîyan avet şi û kuçeyan de vila bi, dêsê tersî derbas kerd û kewt qonaxêko newe yê têkoşînî.

 

Rojnamegare Berîvan Şaho averşîyayîşê Îran û Rojhelatî ercna.

 

‘Şar waştişê xo ano ziwan’

 

Berîvan Şaho da zanayîş ke roja ke rejîmê Îslamî ameyo heta nika û heta vernîya înan şar hemverê bêhuqûqîyan hişyarîye de bîyê û va: “No demêko derg o rewşêka nêqebûlkerdişî est a. Bêedaletî û bêhuqûqîyê verê ameyîne ciwîyayene dimayê rejîmê Îslamî hîna zêde bî. Şar êdî zextê rejîmî qebûl nêkeno. Problemanê ke rejîmî viraştê bi ekonomî sînorkerde nîyi, zor û zehmetîyê girdî yê wareyê edaletê cimatî, asayîş û babetanê bînan de awan kerd. Şar xo asayîş hîs nêkeno. Şar êdî vano êdî tehemulê ma nêmend, ma nê qebûl nêkenê. Yanî vanê heta çareserî bica nêro do têkoşîn dewam bikero.”

 

‘Têkoşîn dorê cinîyan de şekil gêno’

 

Berîvan Şaho dewam de wina qal kerd: “Bi protestoyanê serranê peyênan de tersê şarî hemverê rejîmî de kêmî bîyo. Şar rejîmî qebûl nêkeno. Rejîmî bi serran bi zîndan, îdam, destbend û îşkenceyî tersna. Labelê şar êdî nêterseno. Têkoşînê 10 serranê peyênan nê mojna ma. Îranî de xoverdayîş û têkoşîn resa sewîyeyêka bîn. Şar waştiş û armancê xo de bi israr o. No nêqebûlkerdiş bi felsefeya cinî cuye azadî hîna zêde aver şi û gird bi. Têkoşîn dorê cinîyan de şekil gêno.”

 

‘Her xoverdayîşêk rengê xo est o’

 

Berîvan Şaho dîyar kerd ke xoverdayîşê cinîyan dayo destpêkerdiş, hemverê sîstemê serdestî yê camêrd, sermayedar, pederşahî û rejîmê Îslamî yê Îranî yo. No xoverdayîşêk hemverê rejîm û dewleta camêrdî yo. Ma pêro bi taybetî û şiklê xoverdayîşê xo meydanan de bî. Xoverdayîşo 2022ine de dest pêkerd heta nika dewam kerd. Her xoverdayîşêk wayîrê rengêk cîya bi. Her xoverdayîşêk ke cinîyan dabi destpêkerdiş taybetîyê xo est bî. Cinîyan reng û karakterê xo da çalakîyanê Îran û Rojhelatî.”

 

‘Îranî de çalakîkerdiş sey xo bierzê adirî yo’

 

Berîvan Şaho çalakîyê nika dewam kenê ser o vinderte û wina dergî da: “Şarê Îranî tu dem hemverê bêhuqûqîyan bêveng nêmendo. Cinîyan verê senîn çalakîyan de vengê xo berz kerdî ewro zî eynî helwestî mojnenê. Şar hemverê zextê rejîmê Îslamî de xoverdayîş dewam keno. Îranî çalakîkerdiş sey xo bierzê adirî yo. Pêwa nê şarê Îran û Rojhelatî tu dem peyser game nêeşt.”

 

‘Xêrcê zextan tu çîyêk nêkerd’

 

Berîvan Şaho wina peynîya qiseykerdişê xo ard: “Semedê vurnayîşê rejîmê Îslamî yê Îranî ganî nê waştişan bîyaro ca. Semedo ke şar êdî nêwazeno wina biciwîyo. Di rayîrî hemverê rejîmî de est ê. Yewine ganî vurnayîşêk pêroyî û daîmî bikero. Çareserîyê huqûqî bica bîyaro. Ganî rejîmê Îslamî bivurno. Şar cuyêka demokratîk wazeno. Rejîmê Îranî heta nika xêrcê zextan tu çîyêk awan nêkerd. Demo ke merdim ewnîyeno Îranî ra dewlemend aseno. Eke no rejîm çinbo şar hetê ekonomî de do wurzo lingan ser. Ma qalê welatêk ke eşkeno lingan ser o bimano kenê. Labelê ma vînenê ewro merdimî nêeşkenê nan bivînê û cuya xo bidomnê. Cimatê Îranî zî gane yo û vurnayîşî rê akerde yo.”