MERKEZÊ XEBERAN- Hemsereka Têkilîyanê Teberî yê Rayberîya Vakur û Rojhelatê Sûrîye Îlham Ehmed dîyar kerd ke hukmatê demkî yê Şamî bi îlankerdişê şerê vera taxanê Şêxmeqsûd û Eşrefîye vera kurdan şerê înkarkerdişî dayo destpêkerdene.

 

Hemsereka Têkilîyanê Teberî yê Rayberîya Vakur û Rojhelatê Sûrîye Îlham Ehmed hesabê xo yê X’î ser o dîyar kerd ke hukmatê demkî yê Şamî vera taxanê Şêxmeqsûd û Eşrefîye yê Helebî şer îlan kerdo. Îlham Ehmed îfade kerd ke bi nê kerdişî vera kurdanê ke binê zordarîya rejîmê verî de dejê girdî dîyî, qerarê çinkerdişî ameyo dayene.

 

Îlham Ehmed ard vîrî ke zafaneyê welatijanê her di taxan kesê ke Efrîn ra ameyê koçberkerdene, înan ra yeno pê û wina vat: “Nê her di taxî xora binê dorpêçê hêzanê girêdayeyê Wezaretê Zereyî de yê. Kurdî girêdayeyê Peymana 1ê nîsane mend la hukmatê demkî nê.”

 

Îlham Ehmed reyna vengda hukmatê demkî ke zordarîye ra fekverado û cehd bikero ke probleman bi rayîrê dîyalogî çareser bikero û vat: “Şarê Sûrîye mirdîya xo şerî ra dej anto. Ma vengdanê heme şaranê Sûrîye û bi taybetî ma vengdanê ciwanan ke seba edaletî cehdanê şerî red bikerê.”

 

Grûbê girêdayeyê artêşê Sûrîye saetanê serê sibayî de eşkerayîyek nameyê Odaya Operasyonan ê Artêşê Sûrîye ser o dabi û dîyar kerdbi ke pêroyê hêzê HSD û kurdan hedefê înan de yê.